சாலை போக்குவரத்து அமைச்சகம் புதிய கார் மாடல்களில் AEBS தொழில்நுட்பத்தை 2030-க்குள் கட்டாயமாக்க திட்டமிட்டுள்ளது. வணிக வாகனங்களுக்கு 2027 முதலே இந்த விதிமுறை அமலாகிறது. இது பாதுகாப்பை மேம்படுத்தினாலும், உற்பத்தி செலவை அதிகரித்து கார் விலையை உயர்த்தும் அபாயம் உள்ளது.
சாலை பாதுகாப்பு தொழில்நுட்பத்தை தரப்படுத்துவதில் மத்திய சாலை போக்குவரத்து அமைச்சகம் அதிரடி காட்டி வருகிறது. புதிய திட்டத்தின்படி, அனைத்து புதிய பயணிகள் கார்களிலும் 2030 அக்டோபர் மாதத்திற்குள் 'அட்வான்ஸ்டு எமர்ஜென்சி பிரேக்கிங் சிஸ்டம்' (AEBS) பொருத்தப்பட வேண்டும். தற்போது உற்பத்தியில் உள்ள மாடல்களுக்கு 2032 அக்டோபர் வரை அவகாசம் அளிக்கப்பட்டுள்ளது.
வணிக வாகனங்களுக்கு முன்னுரிமை
கனரக வாகனங்களால் ஏற்படும் விபத்துகளைக் குறைக்க, லாரி மற்றும் பேருந்து தயாரிப்பாளர்கள் 2027 ஜனவரி மாதத்திற்குள் இந்த தொழில்நுட்பத்தை நடைமுறைப்படுத்த வேண்டும். பிரேக்கிங் வசதி மட்டுமின்றி, 'பிளைண்ட்-ஸ்பாட் டிடெக்ஷன்' மற்றும் டிரைவர் சோர்வை கண்டறியும் அலர்ட் சிஸ்டம் போன்ற கூடுதல் பாதுகாப்பு வசதிகளும் இதில் இடம்பெற உள்ளன.
ஆட்டோமொபைல் நிறுவனங்களுக்கு சிக்கல் என்ன?
Maruti Suzuki, Tata Motors மற்றும் Mahindra & Mahindra போன்ற நிறுவனங்களுக்கு இது ஒரு பெரிய சவால். AEBS-க்குத் தேவையான சென்சார்கள், ரேடார்கள் மற்றும் கேமராக்களை காரில் பொருத்துவது உற்பத்தி செலவை கணிசமாக உயர்த்தும். இந்தியாவின் விலை உணர்வு மிக்க சந்தையில், இந்த கூடுதல் செலவை நிறுவனங்கள் தங்கள் லாபத்தில் (Margins) இருந்து எடுத்துக்கொள்ளுமா அல்லது விலையை உயர்த்தி வாடிக்கையாளர்கள் மீது சுமத்துமா என்பதே முக்கிய கேள்வி.
சப்ளை செயின் சவால்
உயர்தர சென்சார்கள் மற்றும் எலக்ட்ரானிக் பாகங்களுக்கு இந்தியா இன்னும் இறக்குமதியையே பெருமளவில் நம்பியுள்ளது. இவற்றை உள்நாட்டிலேயே தயாரிப்பதற்கான கட்டமைப்பு வசதிகளை உருவாக்குவது நிறுவனங்களுக்கு பெரும் சவாலாக இருக்கும். பிரீமியம் கார்களை அதிகம் விற்கும் நிறுவனங்களுக்கு இந்த மாற்றத்தை கையாள்வது எளிதாக இருக்கலாம், ஆனால் பட்ஜெட் கார் தயாரிப்பாளர்கள் தங்கள் லாப வரம்புகளைத் தக்கவைக்க பெரும் போராட்டம் நடத்த வேண்டியிருக்கும்.