தொடர்ந்து குறைந்து வரும் மார்க்கெட் ஷேரை மீண்டும் பிடிக்க Hyundai Motor India அதிரடி முடிவெடுத்துள்ளது. 2030-க்குள் 26 புதிய மாடல் கார்களை அறிமுகப்படுத்த உள்ளதாக அறிவித்துள்ள நிலையில், புனே தொழிற்சாலையில் உற்பத்தியை தீவிரப்படுத்தியுள்ளது.
இந்திய சந்தையில் கடந்த சில ஆண்டுகளாகவே Hyundai நிறுவனத்தின் மார்க்கெட் ஷேர் 17.4%-ல் (FY21) இருந்து 12.5%-ஆக (FY26) சரிந்துள்ளது. இதை ஈடுகட்ட, வரும் 2030-க்குள் 26 புதிய மாடல் கார்களை களமிறக்க அந்நிறுவனம் திட்டமிட்டுள்ளது. தற்போதைய நிலையில் Creta மற்றும் Venue ஆகிய கார்களை மட்டுமே அதிகம் நம்பியிருக்கும் நிலையை மாற்றி, புதிய மாடல்கள் மூலம் விற்பனையை அதிகரிக்க நிறுவனம் முயல்கிறது.
புனே ஆலையில் உற்பத்தியை வேகப்படுத்தும் Hyundai
எதிர்கால தேவையை கருத்தில் கொண்டு, புனே தொழிற்சாலையில் அக்டோபர் 2026-ல் மூன்றாவது ஷிப்டைத் தொடங்க நிறுவனம் முடிவெடுத்துள்ளது. இது திட்டமிட்ட காலக்கெடுவை விட 2 ஆண்டுகள் முந்தையதாகும். இதன் மூலம் ஆண்டு உற்பத்தித் திறன் 9,94,000 யூனிட்டுகளில் இருந்து 11.4 லட்சம் யூனிட்டுகளாக உயரும் என்று எதிர்பார்க்கப்படுகிறது. இருப்பினும், இந்த பிரம்மாண்ட விரிவாக்கம் தற்போதைய நிலையில் பணப்புழக்கத்தில் (Cash flow) தாக்கத்தை ஏற்படுத்த வாய்ப்புள்ளது.
லாப வரம்பில் அழுத்தம்
முதலீட்டாளர்கள் கவனிக்கும் முக்கிய விஷயம் நிறுவனத்தின் லாப வரம்புதான். கடந்த ஆண்டு 14.1% ஆக இருந்த EBITDA மார்ஜின், இந்த காலாண்டில் 10.4% ஆக சரிந்துள்ளது. முழு ஆண்டிற்கான இலக்கை 11% முதல் 14% வரை நிர்வாகம் நிர்ணயித்துள்ளது. ஆனால், புதிய கார் தயாரிப்பு செலவுகள் மற்றும் பணவீக்கம் காரணமாக இந்த இலக்கை எட்டுவது சவாலானதாகவே பார்க்கப்படுகிறது.
மேற்காசிய நாடுகளில் நிலவும் போக்குவரத்து சிக்கல்களால் ஏற்றுமதி வர்த்தகமும் பாதிக்கப்பட்டுள்ளது. இதனால் வரும் நாட்களில், புதிய கார்களின் விற்பனை அந்நிறுவனத்தின் லாபத்தையும், மார்க்கெட் ஷேரையும் எப்படி மீட்டெடுக்கப்போகிறது என்பதை பொறுத்திருந்தே பார்க்க வேண்டும்.