GreenCell Mobility நிறுவனம், தனது இ-பஸ் சேவையை விரிவாக்க டென்மார்க்கின் Impact Fund நிறுவனத்திடம் இருந்து ₹330 கோடியை முதலீடாகப் பெற்றுள்ளது. ஆனால், நிறுவனத்தின் லாபத்தன்மை மற்றும் பேட்டரி தொடர்பான சவால்கள் முதலீட்டாளர்கள் மத்தியில் கேள்விகளை எழுப்பியுள்ளன.
பெரும் முதலீடு!
எலக்ட்ரிக் பஸ் சேவையில் முன்னணியில் உள்ள GreenCell Mobility, தனது அடுத்தகட்ட விரிவாக்கத்திற்காக டென்மார்க்கின் Impact Fund நிறுவனத்திடம் இருந்து ₹330 கோடி ஈக்விட்டி நிதியை திரட்டியுள்ளது. இந்தத் தொகையை கொண்டு இந்தியா முழுவதும் 4,500 புதிய எலக்ட்ரிக் பஸ்களை இயக்க நிறுவனம் திட்டமிட்டுள்ளது. ஒட்டுமொத்தமாக 105 நகரங்களில் 5,000-க்கும் மேற்பட்ட பஸ்களை இயக்கும் இலக்கை நோக்கி நிறுவனம் பயணித்து வருகிறது.
நிதி நிலவரம் என்ன?
நிவாரணம் கிடைத்தாலும், நிறுவனத்தின் நிதி நிலைமை அவ்வளவு சிறப்பாக இல்லை. 2025 நிதி ஆண்டில் சுமார் ₹676.8 கோடி வருவாய் ஈட்டியிருந்தாலும், நிறுவனம் ₹125.2 கோடி நிகர நஷ்டத்தை (Net Loss) சந்தித்துள்ளது. இந்தச் சூழலில், இவ்வளவு பெரிய பிளீட்டை (Fleet) பராமரிப்பது நிறுவனத்திற்கு மிகப்பெரிய சவாலாக பார்க்கப்படுகிறது.
தொழில்நுட்ப சவால்கள்
நிதியுடன் தொழில்நுட்ப சிக்கல்களும் நிறுவனத்தை துரத்துகின்றன. முன்னதாக பயன்படுத்தப்பட்ட LMO வகை பேட்டரிகள் அடிக்கடி பழுதடைந்ததால், நிறுவனம் தற்போது LFP (Lithium Iron Phosphate) வகை பேட்டரிகளுக்கு மாறி வருகிறது. இந்த மாற்றம் தற்காலிகமாக நிறுவனத்தின் லாப வரம்புகளை (Margins) பாதிக்கும் என எதிர்பார்க்கப்படுகிறது.
மேலும், அரசுடன் மேற்கொள்ளப்பட்ட ஒப்பந்தங்களில் ஏற்படும் தாமதங்கள் மற்றும் டெப்போ இடங்கள் கிடைப்பதில் உள்ள சிக்கல்கள், நிறுவனத்தின் வருவாய் ஈட்டும் திறனை நேரடியாக பாதிக்கின்றன. இது ஒரு பிரைவேட் நிறுவனம் என்பதால், பங்குச் சந்தையில் இதன் தாக்கம் இருக்காது என்றாலும், நிறுவனத்தின் செயல்பாட்டுத் திறன் மற்றும் பேட்டரி மாற்றத்தின் வெற்றிதான் அதன் எதிர்காலத்தை தீர்மானிக்கும் முக்கிய காரணியாக இருக்கும்.