உலக அளவில் 'Regenerative Agriculture' எனப்படும் இயற்கை வேளாண்மை முறைக்கு மாற வேண்டிய அவசியம் ஏற்பட்டுள்ளது. இது உணவுப் பாதுகாப்பை உறுதி செய்தாலும், பாரம்பரிய கெமிக்கல் உரம் தயாரிக்கும் நிறுவனங்களின் எதிர்காலத்தை கேள்விக்குள்ளாக்கியுள்ளது.
உலகளாவிய விவசாயத் துறை ஒரு முக்கிய மாற்றத்தை நோக்கி நகர்ந்து கொண்டிருக்கிறது. மக்கள் தொகை பெருக்கம் மற்றும் உணவுத் தேவையை பூர்த்தி செய்ய, தீவிரமான ரசாயன விவசாய முறைகளுக்கு மாற்றாக 'Regenerative Agriculture' முறைக்கு உலகம் திரும்புவது, உர நிறுவனங்களின் எதிர்கால வணிகத்தில் பெரிய தாக்கத்தை ஏற்படுத்தும் என எதிர்பார்க்கப்படுகிறது. 2000-ம் ஆண்டில் 39% ஆக இருந்த விவசாயத் துறை வேலைவாய்ப்பு, 2025-ல் 26% ஆக சரிந்துள்ளது. இது உணவு உற்பத்தியின் ஸ்திரத்தன்மையை உறுதி செய்ய வேண்டிய கட்டாயத்தை ஏற்படுத்தியுள்ளது.
இயற்கை விவசாயத்தின் பலன்கள்
இந்த நவீன வேளாண்மை முறையானது மண் வளத்தை பாதுகாப்பதிலும், இயற்கை உரங்களை பயன்படுத்துவதிலும் கவனம் செலுத்துகிறது. ஆய்வுகளின்படி, இம்முறையை பின்பற்றினால் பயிர் விளைச்சல் 40% வரை உயர வாய்ப்புள்ளது. மேலும், விவசாயிகளின் வருமானம் 50% முதல் 100% வரை அதிகரிக்கலாம் எனக் கணிக்கப்பட்டுள்ளது. அடுத்த 25 ஆண்டுகளில் உலக மக்கள் தொகை 150 கோடி அதிகரிக்க உள்ள சூழலில், கார்பன் வெளியேற்றத்தைக் குறைத்து உணவுத் தேவையைப் பூர்த்தி செய்ய இம்முறை மிக அவசியமாகிறது.
உர நிறுவனங்களுக்கு எச்சரிக்கை
முதலீட்டாளர்கள் கவனிக்க வேண்டியது என்னவென்றால், ரசாயன உரங்கள் மற்றும் பூச்சிக்கொல்லிகளை மட்டுமே தயாரிக்கும் நிறுவனங்கள் எதிர்காலத்தில் சந்தை சவால்களைச் சந்திக்கலாம். அரசுகள் இயற்கை விவசாயத்திற்கு அதிக மானியங்கள் மற்றும் ஊக்கத்தொகை வழங்கத் தொடங்கினால், கெமிக்கல் சார்ந்த தயாரிப்புகளின் தேவை குறைய வாய்ப்புள்ளது.
இருப்பினும், இந்த மாற்றத்திற்கு பெரிய அளவில் முதலீடும், பயிற்சிகளும் தேவை. இடைக்கால கட்டத்தில் விளைச்சலில் ஏற்ற இறக்கங்கள் ஏற்படலாம் என்பதும் ஒரு ரிஸ்க் ஆகும். எனவே, பாரம்பரிய உர நிறுவனங்கள் தங்களை மாற்றிக்கொண்டு, பயோ-ஸ்டிமுலண்ட்ஸ் (Bio-stimulants) மற்றும் துல்லியமான விவசாய தொழில்நுட்பங்களில் (Precision agriculture) முதலீடு செய்கிறார்களா என்பதை முதலீட்டாளர்கள் தொடர்ந்து கண்காணிக்க வேண்டும்.