இந்தியாவின் பால் ஏற்றுமதியை அதிகரிக்க, புதிய உத்தியாக 'Anhydrous Milk Fat' (AMF) உற்பத்தியில் கவனம் செலுத்த அரசு திட்டமிட்டுள்ளது. குறிப்பாக, Bonded Processing Zones-களை பயன்படுத்தி, உள்நாட்டு பால் விநியோகத்தை பாதிக்காமல் மதிப்பு கூட்டப்பட்ட பொருட்களை ஏற்றுமதி செய்ய நடவடிக்கை எடுக்கப்பட உள்ளது.
உலகிலேயே அதிக பால் உற்பத்தி செய்யும் நாடாக இந்தியா இருந்தாலும், நமது மொத்த உற்பத்தியில் ஏற்றுமதி என்பது 1%-க்கும் குறைவாகவே உள்ளது. 2024-25 நிதியாண்டில் இந்தியாவின் பால் உற்பத்தி 247.87 மில்லியன் டன்களாக உயர்ந்துள்ளது. இந்த சூழலில், குறைந்த அளவு மற்றும் சிதறிய ஏற்றுமதி முறையை மாற்றி, சர்வதேச தரம் வாய்ந்த Anhydrous Milk Fat (AMF) உற்பத்தியில் கவனம் செலுத்த பால் பண்ணை துறை தயாராகி வருகிறது.
AMF என்றால் என்ன?
AMF என்பது 99.8%-க்கு மேல் பால் கொழுப்பைக் கொண்ட ஒரு தொழில்முறை மூலப்பொருள். இது பேக்கரி, மிட்டாய் தயாரிப்பு மற்றும் குழந்தைகளுக்கு பால் பவுடர் தயாரிக்கும் நிறுவனங்களில் பெருமளவில் பயன்படுத்தப்படுகிறது. இது நீண்ட காலத்திற்கு கெட்டுப்போகாத தன்மை கொண்டது என்பதால், பெரிய நிறுவனங்களுடன் நீண்ட கால ஒப்பந்தங்களை (Supply Contracts) மேற்கொள்ள இது வசதியாக இருக்கும்.
Bonded Zone-களின் பங்கு
இந்தியாவில் பால் ஏற்றுமதிக்கு இருந்த மிகப்பெரிய சவால், உள்நாட்டு தேவைக்கும் ஏற்றுமதிக்கும் இடையிலான மோதல். அதிக ஏற்றுமதி செய்யும்போது உள்நாட்டில் விலை உயரும், இதனால் அரசு ஏற்றுமதிக்கு கட்டுப்பாடுகளை விதிக்கும். இதை தவிர்க்க, 'Bonded Processing Zones' அல்லது சிறப்பு பொருளாதார மண்டலங்களை (SEZs) பயன்படுத்த அரசு திட்டமிட்டுள்ளது. இங்கு வெளிநாடுகளில் இருந்து மூலப்பொருட்களை இறக்குமதி செய்து, அதை AMF ஆக மாற்றி மீண்டும் வெளிநாடுகளுக்கே ஏற்றுமதி செய்வதால், இந்திய மக்களின் பால் விநியோகத்தில் எந்த சிக்கலும் ஏற்படாது.
சந்தை வாய்ப்புகள் மற்றும் சவால்கள்
வளைகுடா நாடுகள் மற்றும் தெற்காசிய பிராந்தியங்களுக்கு அருகில் இருப்பது இந்தியாவுக்கு ஒரு பெரிய லாஜிஸ்டிக்ஸ் சாதகம். ஏற்கனவே 2024-ல் கீ மற்றும் வெண்ணெய் ஏற்றுமதி $330 மில்லியன் என்ற அளவை எட்டியுள்ளது. நைஜீரியா மற்றும் அல்ஜீரியா போன்ற ஆப்பிரிக்க நாடுகளிலும் நல்ல தேவை உள்ளது.
இருப்பினும், முதலீட்டாளர்கள் கவனிக்க வேண்டிய விஷயங்கள் சில உள்ளன:
- விலை ஏற்ற இறக்கம்: சர்வதேச பால் உற்பத்தி சுழற்சிக்கு ஏற்ப AMF விலை மாறும்.
- உள்கட்டமைப்பு: சர்வதேச நிறுவனங்களுடன் போட்டியிட கோல்ட்-செயின் (Cold-chain) வசதிகளுக்கு பெரிய முதலீடு தேவை.
- கொள்கை மாற்றம்: பால் ஒரு அத்தியாவசிய பொருள் என்பதால், விலைவாசி உயரும்போது அரசு திடீர் ஏற்றுமதி கட்டுப்பாடுகளை விதிக்கும் அபாயம் உண்டு.