ਨੀਦਰਲੈਂਡ ਦੀ ਪੁਲਿਸ ਨੇ Neo Security ਦੇ ਇੱਕ 24 ਸਾਲਾ ਅਧਿਕਾਰੀ ਨੂੰ ਗ੍ਰਿਫਤਾਰ ਕੀਤਾ ਹੈ, ਜਿਸਦੇ ਸਬੰਧ ਖਤਰਨਾਕ ਹੈਕਰ ਗਰੁੱਪ ShinyHunters ਨਾਲ ਦੱਸੇ ਜਾ ਰਹੇ ਹਨ। ਮੁਲਜ਼ਮ 'ਤੇ ਸਾਈਬਰ ਜਬਰ-ਜ਼ਨਾਹ ਅਤੇ ਕਤਲ ਦੀ ਸਾਜਿਸ਼ ਰਚਣ ਵਰਗੇ ਗੰਭੀਰ ਦੋਸ਼ ਲੱਗੇ ਹਨ।
ਇਸ ਮਾਮਲੇ ਨੇ ਸਾਈਬਰ ਸੁਰੱਖਿਆ ਜਗਤ ਵਿੱਚ ਵੱਡਾ ਭੂਚਾਲ ਲਿਆ ਦਿੱਤਾ ਹੈ। ਐਮਸਟਰਡਮ ਵਿੱਚ ਹੋਈ ਰੇਡ ਦੌਰਾਨ ਪੁਲਿਸ ਨੇ 24 ਸਾਲਾ Pepijn van der Stap ਨੂੰ ਫੜਿਆ, ਜੋ ਕਿ Neo Security ਵਿੱਚ CTO ਦੇ ਅਹੁਦੇ 'ਤੇ ਤਾਇਨਾਤ ਸੀ। ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਉਹ ਦੁਨੀਆ ਦੇ ਸਭ ਤੋਂ ਖਤਰਨਾਕ ਹੈਕਰ ਗਰੁੱਪਾਂ ਵਿੱਚੋਂ ਇੱਕ, ShinyHunters ਨਾਲ ਜੁੜਿਆ ਹੋਇਆ ਸੀ।
ਗੰਭੀਰ ਦੋਸ਼ਾਂ ਦਾ ਖੁਲਾਸਾ
ਸਿਰਫ ਡੇਟਾ ਚੋਰੀ ਹੀ ਨਹੀਂ, ਸਗੋਂ ਪੁਲਿਸ ਨੂੰ ਮੁਲਜ਼ਮ ਦੇ ਹਾਰਡਵੇਅਰ ਤੋਂ ਕਤਲ ਦੀ ਸਾਜਿਸ਼ ਦੇ ਸਬੂਤ ਵੀ ਮਿਲੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਵਿਦੇਸ਼ੀ ਧਰਤੀ 'ਤੇ 2 ਕਤਲਾਂ ਨੂੰ ਅੰਜਾਮ ਦੇਣ ਦੀ ਯੋਜਨਾ ਬਣਾ ਰਿਹਾ ਸੀ। ਮੁਲਜ਼ਮ ਨੂੰ ਘੱਟੋ-ਘੱਟ 90 ਦਿਨਾਂ ਲਈ ਹਿਰਾਸਤ ਵਿੱਚ ਰੱਖਿਆ ਗਿਆ ਹੈ।
ਕਾਰਪੋਰੇਟ ਜਗਤ ਲਈ ਵੱਡਾ ਖਤਰਾ
ShinyHunters ਪਹਿਲਾਂ ਵੀ AT&T, Ticketmaster ਅਤੇ Odido ਵਰਗੀਆਂ ਦਿੱਗਜ ਕੰਪਨੀਆਂ ਦਾ ਡੇਟਾ ਚੋਰੀ ਕਰ ਚੁੱਕਾ ਹੈ। ਇੱਥੋਂ ਤੱਕ ਕਿ ਇਹ ਗਰੁੱਪ FBI ਦੇ ਸਰਵਰਾਂ ਵਿੱਚ ਵੀ ਸੰਨ੍ਹ ਲਾਉਣ ਦਾ ਦਾਅਵਾ ਕਰ ਚੁੱਕਾ ਹੈ। ਇਸ ਘਟਨਾ ਨੇ ਸੁਰੱਖਿਆ ਫਰਮਾਂ ਦੀ ਭਰੋਸੇਯੋਗਤਾ 'ਤੇ ਵੱਡੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਜਿਨ੍ਹਾਂ ਕੰਪਨੀਆਂ ਨੇ ਆਪਣੀ ਸੁਰੱਖਿਆ ਇਹਨਾਂ ਫਰਮਾਂ ਨੂੰ ਸੌਂਪੀ ਹੈ, ਉਨ੍ਹਾਂ ਲਈ ਹੁਣ ਵੱਡਾ ਰਿਪੁਟੇਸ਼ਨਲ ਅਤੇ ਆਪਰੇਸ਼ਨਲ ਜੋਖਮ ਪੈਦਾ ਹੋ ਗਿਆ ਹੈ।