ਮੁੰਬਈ ਦੇ ਇਤਿਹਾਸਕ Kyani & Co. ਨੂੰ Maharashtra FDA ਵੱਲੋਂ ਬੰਦ ਕਰ ਦਿੱਤਾ ਗਿਆ ਹੈ। ਇੱਥੇ ਹਾਈਜੀਨ ਵਿੱਚ ਭਾਰੀ ਲਾਪਰਵਾਹੀ ਅਤੇ ਕੀੜੇ-ਮਕੌੜੇ ਪਾਏ ਜਾਣ ਤੋਂ ਬਾਅਦ ਇਹ ਸਖ਼ਤ ਐਕਸ਼ਨ ਲਿਆ ਗਿਆ ਹੈ।
FDA ਦੀ ਸਖ਼ਤ ਕਾਰਵਾਈ
ਮੁੰਬਈ ਦੇ ਦੱਖਣੀ ਇਲਾਕੇ ਵਿੱਚ ਸਥਿਤ 122 ਸਾਲ ਪੁਰਾਣੇ ਮਸ਼ਹੂਰ ਕੈਫੇ Kyani & Co. 'ਤੇ 27 ਸਤੰਬਰ ਨੂੰ ਹੋਈ ਅਚਨਚੇਤ ਚੈਕਿੰਗ ਦੌਰਾਨ FDA ਅਧਿਕਾਰੀਆਂ ਨੂੰ ਕਈ ਖਤਰਨਾਕ ਹਾਲਾਤ ਦੇਖਣ ਨੂੰ ਮਿਲੇ। ਜਾਂਚ ਰਿਪੋਰਟ ਮੁਤਾਬਕ, ਜਿੱਥੇ ਖਾਣਾ ਤਿਆਰ ਹੁੰਦਾ ਹੈ, ਉੱਥੇ ਚੂਹੇ, ਮੱਖੀਆਂ ਅਤੇ ਮਰੇ ਹੋਏ ਕਾਕਰੋਚ ਪਾਏ ਗਏ। ਸਭ ਤੋਂ ਹੈਰਾਨ ਕਰਨ ਵਾਲੀ ਗੱਲ ਇਹ ਸੀ ਕਿ ਫਰਿੱਜ ਵਿੱਚ ਖੂਨ ਦੇ ਨਿਸ਼ਾਨ ਅਤੇ ਖਾਣ-ਪੀਣ ਵਾਲੀਆਂ ਚੀਜ਼ਾਂ ਦੇ ਕੋਲ ਹੀ ਖੁੱਲ੍ਹਾ ਗਟਰ ਵੀ ਪਾਇਆ ਗਿਆ।
ਸੂਬਾ ਪੱਧਰੀ ਮੁਹਿੰਮ
ਇਹ ਕਾਰਵਾਈ ਮਹਾਰਾਸ਼ਟਰ ਸਰਕਾਰ ਵੱਲੋਂ ਤਿਉਹਾਰਾਂ ਦੇ ਸੀਜ਼ਨ ਦੌਰਾਨ ਚਲਾਈ ਗਈ ਸੁਰੱਖਿਆ ਮੁਹਿੰਮ ਦਾ ਹਿੱਸਾ ਹੈ। ਇਸ ਦੌਰਾਨ ਮੁੰਬਈ, ਪੁਣੇ, ਕੋਕਣ ਅਤੇ ਸੰਭਾਜੀਨਗਰ ਸਮੇਤ ਪੂਰੇ ਸੂਬੇ ਵਿੱਚ 30 ਅਦਾਰਿਆਂ ਦੇ ਲਾਇਸੈਂਸ ਮੁਅੱਤਲ ਕੀਤੇ ਗਏ ਹਨ, ਜਿਨ੍ਹਾਂ ਵਿੱਚੋਂ 13 ਸਿਰਫ਼ ਮੁੰਬਈ ਵਿੱਚ ਹਨ।
ਕਿੰਨਾ ਹੋਇਆ ਜ਼ਬਤ?
FDA ਦੀ ਇਸ ਮੁਹਿੰਮ ਵਿੱਚ ਦੁੱਧ, ਮਠਿਆਈਆਂ ਅਤੇ ਸੁੱਕੇ ਰਾਸ਼ਨ ਸਮੇਤ ਲਗਭਗ 50.6 ਟਨ ਸਮੱਗਰੀ ਜ਼ਬਤ ਕੀਤੀ ਗਈ ਹੈ, ਜਿਸ ਦੀ ਕੁੱਲ ਕੀਮਤ ₹1.19 ਕਰੋੜ ਦੱਸੀ ਜਾ ਰਹੀ ਹੈ। ਇਸ ਮਾਮਲੇ ਵਿੱਚ ਹੁਣ ਤੱਕ 22 FIR ਦਰਜ ਕੀਤੀਆਂ ਗਈਆਂ ਹਨ ਅਤੇ 30 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਕੈਫੇ ਨੂੰ ਦੁਬਾਰਾ ਖੋਲ੍ਹਣ ਲਈ ਹੁਣ ਪ੍ਰਬੰਧਨ ਨੂੰ ਸਫਾਈ ਦੇ ਸਾਰੇ ਮਿਆਰਾਂ ਨੂੰ ਪੂਰਾ ਕਰਕੇ FDA ਤੋਂ ਕਲੀਅਰੈਂਸ ਲੈਣੀ ਪਵੇਗੀ।