FSSAI ਨੇ ਨਵੀਂ ਦਿੱਲੀ ਦੇ Radisson Blu ਹੋਟਲ ਦੇ ਆਪਰੇਟਰ, AB Hotels Ltd ਨੂੰ ਸਖ਼ਤ ਨੋਟਿਸ ਜਾਰੀ ਕੀਤਾ ਹੈ। ਜਾਂਚ ਦੌਰਾਨ ਹੋਟਲ ਵਿੱਚ ਗੰਭੀਰ ਸਫਾਈ ਉਲੰਘਣਾਵਾਂ ਅਤੇ ਖਾਣ-ਪੀਣ ਦੇ ਮਾਪਦੰਡਾਂ ਵਿੱਚ ਕਮੀਆਂ ਪਾਈਆਂ ਗਈਆਂ ਹਨ, ਜਿਸ ਕਾਰਨ ਹੋਟਲ ਦਾ ਫੂਡ ਲਾਇਸੈਂਸ ਰੱਦ ਹੋਣ ਦਾ ਖਤਰਾ ਬਣਿਆ ਹੋਇਆ ਹੈ।
ਸਫਾਈ 'ਤੇ ਵੱਡੇ ਸਵਾਲ
FSSAI ਦੀ ਤਾਜ਼ਾ ਜਾਂਚ ਨੇ Radisson Blu ਦੇ ਰੱਖ-ਰਖਾਅ 'ਤੇ ਵੱਡੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਇੰਸਪੈਕਟਰਾਂ ਨੂੰ ਹੋਟਲ ਵਿੱਚ ਕੀੜੇ-ਮਕੌੜੇ, ਜੰਗਾਲ ਲੱਗੇ ਉਪਕਰਣ ਅਤੇ ਖਰਾਬ ਫਰਿੱਜ ਵਰਗੀਆਂ ਸਮੱਸਿਆਵਾਂ ਮਿਲੀਆਂ ਹਨ। ਇਸ ਤੋਂ ਇਲਾਵਾ, ਵੇਸਟ ਮੈਨੇਜਮੈਂਟ ਵਿੱਚ ਵੀ ਵੱਡੀਆਂ ਖਾਮੀਆਂ ਸਾਹਮਣੇ ਆਈਆਂ ਹਨ।
ਖਾਣੇ ਦੀ ਗੁਣਵੱਤਾ ਨਾਲ ਖਿਲਵਾੜ
ਸਭ ਤੋਂ ਹੈਰਾਨ ਕਰਨ ਵਾਲੀ ਗੱਲ ਇਹ ਹੈ ਕਿ ਰਸੋਈ ਵਿੱਚ ਵਰਤੇ ਜਾਣ ਵਾਲੇ ਖਾਣ ਵਾਲੇ ਤੇਲ ਵਿੱਚ Total Polar Compound (TPC) ਦੀ ਮਾਤਰਾ 31 ਤੱਕ ਪਹੁੰਚ ਗਈ ਸੀ, ਜੋ ਕਿ ਮਨਜ਼ੂਰਸ਼ੁਦਾ ਸੁਰੱਖਿਆ ਸੀਮਾ ਤੋਂ ਕਿਤੇ ਜ਼ਿਆਦਾ ਹੈ। ਮਾਹਰਾਂ ਮੁਤਾਬਕ, ਅਜਿਹਾ ਤੇਲ ਸਿਹਤ ਲਈ ਬਹੁਤ ਨੁਕਸਾਨਦੇਹ ਹੁੰਦਾ ਹੈ। ਇਸ ਦੇ ਨਾਲ ਹੀ ਹੋਟਲ ਵੱਲੋਂ ਖਰਾਬ ਸਬਜ਼ੀਆਂ ਅਤੇ ਹੋਰ ਸਮੱਗਰੀ ਖਰੀਦਣ ਦੀ ਵੀ ਪੁਸ਼ਟੀ ਹੋਈ ਹੈ।
ਹੁਣ ਕੀ ਹੋਵੇਗਾ?
FSSAI ਨੇ ਪ੍ਰਬੰਧਕਾਂ ਨੂੰ ਤੁਰੰਤ ਜਵਾਬਦੇਹੀ ਤੈਅ ਕਰਨ ਅਤੇ ਸਾਰੀਆਂ ਕਮੀਆਂ ਨੂੰ ਦੂਰ ਕਰਨ ਦਾ ਨੋਟਿਸ ਦਿੱਤਾ ਹੈ। ਜੇਕਰ ਹੋਟਲ ਪ੍ਰਬੰਧਨ ਸਮੇਂ ਸਿਰ ਸਫਾਈ ਅਤੇ ਕੁਆਲਿਟੀ ਵਿੱਚ ਸੁਧਾਰ ਦੇ ਸਬੂਤ ਪੇਸ਼ ਨਹੀਂ ਕਰਦਾ, ਤਾਂ ਉਨ੍ਹਾਂ ਦਾ ਫੂਡ ਲਾਇਸੈਂਸ ਸਸਪੈਂਡ ਕੀਤਾ ਜਾ ਸਕਦਾ ਹੈ, ਜੋ ਕਿ ਹੋਟਲ ਦੇ F&B ਡਿਵੀਜ਼ਨ ਲਈ ਵੱਡਾ ਝਟਕਾ ਸਾਬਤ ਹੋਵੇਗਾ।