ਭਾਰਤੀ ਮਹਿਲਾ ਨਿਵੇਸ਼ਕਾਂ ਨੇ ਆਪਣੇ ਮਿਊਚਲ ਫੰਡ ਨਿਵੇਸ਼ ਵਿੱਚ ਵੱਡੀ ਤਬਦੀਲੀ ਕੀਤੀ ਹੈ। ਮਾਰਚ **2025** ਤੱਕ, ਮਹਿਲਾਵਾਂ ਨੇ ਆਪਣੇ ਕੁੱਲ ਫੰਡਾਂ ਦਾ **65%** ਹਿੱਸਾ ਇਕੁਇਟੀ ਵਿੱਚ ਲਗਾਇਆ ਹੈ, ਜੋ ਕਿ ਪੰਜ ਸਾਲ ਪਹਿਲਾਂ ਸਿਰਫ਼ **40%** ਸੀ। ਖਾਸ ਗੱਲ ਇਹ ਹੈ ਕਿ ਛੋਟੇ ਸ਼ਹਿਰਾਂ (B30) ਵਿੱਚ ਇਹ ਰੁਝਾਨ ਸਭ ਤੋਂ ਵੱਧ ਦੇਖਣ ਨੂੰ ਮਿਲ ਰਿਹਾ ਹੈ।
ਪਿਛਲੇ ਪੰਜ ਸਾਲਾਂ ਵਿੱਚ ਭਾਰਤੀ ਮਹਿਲਾਵਾਂ ਦਾ ਨਿਵੇਸ਼ ਪ੍ਰਤੀ ਨਜ਼ਰੀਆ ਬਦਲ ਗਿਆ ਹੈ। ਮਾਰਚ 2020 ਵਿੱਚ ਜੋ ਅੰਕੜਾ 40% ਸੀ, ਉਹ ਮਾਰਚ 2025 ਤੱਕ 65% ਤੱਕ ਪਹੁੰਚ ਗਿਆ ਹੈ। ਇਹ 25 ਪ੍ਰਤੀਸ਼ਤ ਦਾ ਉਛਾਲ ਦਰਸਾਉਂਦਾ ਹੈ ਕਿ ਮਹਿਲਾ ਨਿਵੇਸ਼ਕ ਹੁਣ ਲੰਬੇ ਸਮੇਂ ਦੇ ਵਾਧੇ ਲਈ ਜੋਖਮ ਲੈਣ ਤੋਂ ਨਹੀਂ ਡਰ ਰਹੀਆਂ।
B30 ਬਨਾਮ T30: ਨਿਵੇਸ਼ ਦਾ ਅੰਤਰ
ਜੁਲਾਈ 2026 ਦੇ ਅੰਕੜੇ ਦੱਸਦੇ ਹਨ ਕਿ ਦੇਸ਼ ਦੇ ਛੋਟੇ ਸ਼ਹਿਰਾਂ (B30) ਵਿੱਚ ਇਕੁਇਟੀ ਦਾ ਕ੍ਰੇਜ਼ ਜ਼ਿਆਦਾ ਹੈ, ਜਿੱਥੇ ਇਹ ਸਕੀਮਾਂ ਕੁੱਲ ਸੰਪਤੀ ਦਾ 65.9% ਹਿੱਸਾ ਰੱਖਦੀਆਂ ਹਨ। ਇਸ ਦੇ ਉਲਟ, ਵੱਡੇ ਸ਼ਹਿਰਾਂ (T30) ਵਿੱਚ ਇਹ ਅੰਕੜਾ 39.8% ਹੈ, ਜਿੱਥੇ ਨਿਵੇਸ਼ਕ ਅਜੇ ਵੀ ਡੈੱਟ (Debt) ਫੰਡਾਂ ਨੂੰ ਪਹਿਲ ਦੇ ਰਹੇ ਹਨ।
ਬਾਜ਼ਾਰ ਦੀ ਗਿਰਾਵਟ 'ਚ ਵੀ ਵਧ ਰਹੇ ਹਨ ਖਾਤੇ
ਬਾਜ਼ਾਰ ਵਿੱਚ ਉਤਰਾਅ-ਚੜ੍ਹਾਅ ਦੇ ਬਾਵਜੂਦ ਨਿਵੇਸ਼ਕਾਂ ਦਾ ਭਰੋਸਾ ਟੁੱਟਿਆ ਨਹੀਂ ਹੈ। ਫਰਵਰੀ 2026 ਤੋਂ ਮਾਰਚ 2026 ਦੇ ਵਿਚਕਾਰ, ਜਦੋਂ ਇਕੁਇਟੀ ਫੰਡਾਂ ਦੀ ਕੁੱਲ ਵੈਲਿਊ ₹35.39 ਲੱਖ ਕਰੋੜ ਤੋਂ ਘਟ ਕੇ ₹31.98 ਲੱਖ ਕਰੋੜ ਰਹਿ ਗਈ ਸੀ, ਉਸ ਸਮੇਂ ਵੀ ਨਿਵੇਸ਼ਕਾਂ ਦੇ ਖਾਤਿਆਂ (Folios) ਦੀ ਗਿਣਤੀ 18.12 ਕਰੋੜ ਤੋਂ ਵਧ ਕੇ 18.27 ਕਰੋੜ ਹੋ ਗਈ। ਅਗਸਤ 2021 ਵਿੱਚ ਇਹ ਗਿਣਤੀ ਸਿਰਫ਼ 7.3 ਕਰੋੜ ਸੀ, ਜੋ ਅਗਸਤ 2026 ਤੱਕ 18.9 ਕਰੋੜ ਤੱਕ ਪਹੁੰਚ ਗਈ ਹੈ। ਇਹ ਦਰਸਾਉਂਦਾ ਹੈ ਕਿ ਨਿਵੇਸ਼ਕ ਮਾਰਕੀਟ ਦੀ ਗਿਰਾਵਟ ਦੇ ਦੌਰਾਨ ਵੀ ਆਪਣਾ ਪੈਸਾ ਕੱਢਣ ਦੀ ਬਜਾਏ ਨਿਵੇਸ਼ ਜਾਰੀ ਰੱਖ ਰਹੇ ਹਨ।