Home Credit India ਦੀ ਤਾਜ਼ਾ ਰਿਪੋਰਟ ਮੁਤਾਬਕ ਭਾਰਤੀ ਪਰਿਵਾਰ ਹੁਣ ਫਾਲਤੂ ਖਰਚੇ ਛੱਡ ਕੇ ਲੰਬੇ ਸਮੇਂ ਦੇ ਐਸੇਟ ਬਣਾਉਣ ਵੱਲ ਵਧ ਰਹੇ ਹਨ। 31% ਲੋਕਾਂ ਦਾ ਮੁੱਖ ਟੀਚਾ ਆਪਣਾ ਘਰ ਖਰੀਦਣਾ ਹੈ, ਜਦਕਿ Gen Z ਨੌਜਵਾਨਾਂ ਨੇ ਬੱਚਤ ਕਰਨ ਵਿੱਚ ਸਭ ਨੂੰ ਪਿੱਛੇ ਛੱਡ ਦਿੱਤਾ ਹੈ।
ਭਾਰਤੀ ਖਪਤਕਾਰਾਂ ਦੇ ਰਵੱਈਏ ਵਿੱਚ ਸਾਲ 2026 ਵਿੱਚ ਇੱਕ ਵੱਡਾ ਬਦਲਾਅ ਦੇਖਣ ਨੂੰ ਮਿਲ ਰਿਹਾ ਹੈ। Home Credit India ਦੀ 'Great Indian Wallet 2026' ਸਟੱਡੀ ਮੁਤਾਬਕ, ਲੋਕ ਹੁਣ ਐਸ਼ੋ-ਆਰਾਮ ਦੀਆਂ ਚੀਜ਼ਾਂ ਦੀ ਬਜਾਏ ਘਰ ਅਤੇ ਬਿਜ਼ਨਸ ਸਾਜ਼ੋ-ਸਾਮਾਨ ਵਰਗੇ ਐਸੇਟਸ ਬਣਾਉਣ ਨੂੰ ਪਹਿਲ ਦੇ ਰਹੇ ਹਨ।
ਵਿੱਤੀ ਸੁਧਾਰ ਦੇ ਸੰਕੇਤ
ਇਸ ਬਦਲਾਅ ਦੀ ਝਲਕ 'Financial Well-Being Index' ਵਿੱਚ ਦਿਖਾਈ ਦਿੰਦੀ ਹੈ, ਜੋ ਪਿਛਲੇ ਸਾਲ ਦੇ 34 ਪੁਆਇੰਟਾਂ ਤੋਂ ਵੱਧ ਕੇ ਇਸ ਵਾਰ 40 'ਤੇ ਪਹੁੰਚ ਗਿਆ ਹੈ। ਇਸ ਦਾ ਸਭ ਤੋਂ ਵੱਡਾ ਕਾਰਨ ਡਿਜੀਟਲ ਵਿੱਤੀ ਟੂਲਜ਼ ਦੀ ਵਰਤੋਂ ਹੈ, ਜਿੱਥੇ 82% ਲੋਕ ਮੰਨਦੇ ਹਨ ਕਿ ਇਹ ਸਾਧਨ ਉਨ੍ਹਾਂ ਦੇ ਭਵਿੱਖ ਦੀ ਪਲਾਨਿੰਗ ਲਈ ਜ਼ਰੂਰੀ ਹਨ।
ਘਰ ਬਣਾਉਣ ਦਾ ਸੁਪਨਾ
ਹੇਠਲੇ-ਮੱਧ ਵਰਗ (Lower-middle-class) ਵਿੱਚ ਘਰ ਖਰੀਦਣਾ ਇੱਕ ਮੁੱਖ ਟੀਚਾ ਬਣ ਗਿਆ ਹੈ। 31% ਲੋਕਾਂ ਨੇ ਅਗਲੇ 5 ਸਾਲਾਂ ਵਿੱਚ ਆਪਣਾ ਘਰ ਬਣਾਉਣ ਦਾ ਨਿਸ਼ਾਨਾ ਰੱਖਿਆ ਹੈ, ਜੋ ਕਿ ਪਿਛਲੇ ਸਾਲ ਦੇ ਮੁਕਾਬਲੇ 8% ਜ਼ਿਆਦਾ ਹੈ। ਕ੍ਰੈਡਿਟ ਦਾ ਇਸਤੇਮਾਲ ਹੁਣ ਰੋਜ਼ਾਨਾ ਖਰਚਿਆਂ ਲਈ ਨਹੀਂ, ਸਗੋਂ ਜਾਇਦਾਦ ਬਣਾਉਣ ਲਈ ਇੱਕ ਰਣਨੀਤੀ ਵਜੋਂ ਕੀਤਾ ਜਾ ਰਿਹਾ ਹੈ।
Gen Z ਦੀ ਬੱਲੇ-ਬੱਲੇ
ਇਸ ਨਵੀਂ ਲਹਿਰ ਵਿੱਚ ਨੌਜਵਾਨ ਪੀੜ੍ਹੀ (Gen Z) ਅੱਗੇ ਹੈ। ਡਾਟਾ ਦੱਸਦਾ ਹੈ ਕਿ 58% Gen Z ਨੌਜਵਾਨਾਂ ਨੇ ਆਪਣੀ ਬੱਚਤ ਵਧਾਈ ਹੈ, ਜੋ ਹੋਰ ਉਮਰ ਵਰਗਾਂ ਦੇ ਮੁਕਾਬਲੇ ਕਾਫੀ ਜ਼ਿਆਦਾ ਹੈ।
ਆਉਣ ਵਾਲੇ ਸਮੇਂ ਦੇ ਜੋਖਮ
ਭਾਵੇਂ ਉਤਸ਼ਾਹ ਵੱਧ ਰਿਹਾ ਹੈ, ਪਰ ਹਕੀਕਤ ਇਹ ਹੈ ਕਿ ਹੇਠਲੇ-ਮੱਧ ਵਰਗ ਦੀ ਔਸਤ ਮਹੀਨਾਵਾਰ ਆਮਦਨ ਲਗਭਗ ₹35,000 ਦੇ ਆਸ-ਪਾਸ ਹੀ ਹੈ। ਜੇਕਰ ਮਹਿੰਗਾਈ ਵਧਦੀ ਰਹੀ ਅਤੇ ਆਮਦਨ ਉਸ ਰਫਤਾਰ ਨਾਲ ਨਾ ਵਧੀ, ਤਾਂ ਕਰਜ਼ੇ ਦੇ ਬੋਝ ਹੇਠ ਪਰਿਵਾਰਾਂ 'ਤੇ ਵਿੱਤੀ ਦਬਾਅ ਪੈ ਸਕਦਾ ਹੈ। ਵਿਆਜ ਦਰਾਂ ਅਤੇ ਪ੍ਰੋਸੈਸਿੰਗ ਫੀਸਾਂ ਨੂੰ ਲੈ ਕੇ ਵੀ ਖਪਤਕਾਰ ਅਜੇ ਕਾਫੀ ਸਾਵਧਾਨ ਹਨ।