AI मधील प्रगतीसाठी प्रसिद्ध असलेल्या RapidCanvas या स्टार्टअपला Series B राउंडमध्ये $29 दशलक्षचा निधी मिळाला आहे. आतापर्यंत कंपनीचे एकूण फंडींग $52.5 दशलक्ष झाले असून, या पैशांचा वापर भारत, अमेरिका आणि ब्राझीलमधील इंजिनिअरिंग टीम वाढवण्यासाठी केला जाणार आहे.
मोठ्या गुंतवणुकीचा फायदा
या फंडिंग राउंडचे नेतृत्व Vertex Ventures SEA & India यांनी केले असून यात Hitachi Ventures चा देखील समावेश आहे. याव्यतिरिक्त Accel, Peak XV Partners, Valley Capital Partners आणि Titanium Ventures यांसारख्या जुन्या गुंतवणूकदारांनीही या राऊंडमध्ये रस दाखवला आहे. कंपनीची एकूण जमा पुंजी आता $52.5 दशलक्ष वर पोहोचली आहे.
व्यवसायाचे स्वरूप आणि टार्गेट
RapidCanvas चे बिझनेस मॉडेल हे केवळ एआय (AI) प्रयोग करण्यापुरते मर्यादित नसून, ते प्रत्यक्ष व्यवसायाला नफा मिळवून देण्यावर भर देते. अनेक मोठ्या कंपन्यांना त्यांचे एआय प्रोटोटाइप्स प्रत्यक्ष वापरामध्ये (Production) आणताना अडचणी येतात, तिथे ही कंपनी आपल्या प्रगत प्लॅटफॉर्म आणि इंजिनिअर्सच्या माध्यमातून मदत करते. सध्या कंपनी $100 दशलक्ष ते $10 अब्ज दरम्यान वार्षिक उत्पन्न असलेल्या मिड-टू-लार्ज एंटरप्रायझेसना टार्गेट करत आहे.
जागतिक बाजारातील संधी
Gartner च्या अहवालानुसार, 2029 पर्यंत थेट एआय सेवांवरील जागतिक खर्च $516 अब्ज पर्यंत पोहोचण्याची शक्यता आहे. या पार्श्वभूमीवर, एआय क्षेत्रात भारताचे वाढते महत्त्व आणि स्टार्टअप्समधील गुंतवणूक हे एक मोठे परिवर्तन मानले जात आहे. आता या नवीन भांडवलासह कंपनीला एआय इंजिनिअर्सची भरती करून आपले जागतिक नेटवर्क अधिक मजबूत करण्याचे आव्हान पेलावे लागणार आहे.