Zomato चे संस्थापक Deepinder Goyal यांच्या 'Temple' या स्टार्टअपनी लंडनस्थित Longevous या कंपनीला खरेदी केले आहे. २०२६ मध्ये लाँच होणाऱ्या प्रीमियम वेअरेबल डिव्हाइससाठी हे पाऊल अत्यंत महत्त्वाचे मानले जात आहे.
क्लिनिकल तज्ज्ञांची फौज सज्ज
या करारानुसार, Longevous चे संस्थापक डॉ. रॉबर्ट मोहर आणि डॉ. आवी रॉय हे आता पूर्णवेळ Temple सोबत काम करणार आहेत. हे दोन्ही तज्ज्ञ कंपनीच्या 'Entropy' या हेल्थ मेट्रिकचे वैज्ञानिक प्रमाणीकरण (Scientific Validation) करण्यासाठी नेतृत्व करतील. Temple चे हे आगामी वेअरेबल डिव्हाइस सामान्य स्मार्ट वॉचपेक्षा वेगळे असून, ते कपाळावर लावून मेंदूतील रक्ताभिसरण आणि ऑक्सिजनची पातळी मोजण्यासाठी डिझाइन केले आहे.
५०० दशलक्ष डॉलर्सचे व्हॅल्युएशन?
येथे हे स्पष्ट करणे गरजेचे आहे की, Temple हा Zomato चा भाग नसून एक स्वतंत्र प्रायव्हेट स्टार्टअप आहे. कंपनीने आतापर्यंत $54 दशलक्ष निधी उभारला आहे. सूत्रांच्या माहितीनुसार, कंपनी लवकरच नवीन फंड उभारणीच्या तयारीत असून, यामुळे तिचे मार्केट व्हॅल्युएशन $500 दशलक्ष च्या घरात पोहोचू शकते.
किंमत आणि आव्हाने
Temple चे हे प्रीमियम डिव्हाइस २०२६ च्या अखेरीस बाजारात येईल. याची किंमत ₹75,000 ते ₹80,000 च्या दरम्यान असण्याची शक्यता आहे, ज्यामध्ये लाइफटाइम सॉफ्टवेअर सबस्क्रिप्शन आणि आवश्यक साहित्याचा समावेश असेल. मात्र, या स्टार्टअपसमोर काही मोठी आव्हानेही आहेत. सध्या कंपनीकडे मेडिकल डिव्हाइसचे अधिकृत सर्टिफिकेशन नाही, तसेच 'Entropy' मेट्रिकच्या उपयुक्ततेबद्दल वैज्ञानिक क्षेत्रातूनही शंका उपस्थित केल्या जात आहेत. प्रीमियम किंमत असताना ग्राहकांना आकर्षित करणे हे कंपनीसाठी मोठे कसब ठरणार आहे.