Telangana RERA ने फ्लॅटच्या पझेशनला १८ महिने उशीर करणाऱ्या बिल्डरला मोठा दणका दिला आहे. नियमांचे उल्लंघन केल्याप्रकरणी बिल्डरला १०.७% व्याज देण्याचे आदेश दिले असून ३०,००० रुपयांचे अतिरिक्त शुल्कही रद्द केले आहे.
घर खरेदीदारांसाठी दिलासादायक बातमी आहे. तेलंगणा रिअल इस्टेट रेग्युलेटरी अथॉरिटीने (Telangana RERA) वेळेवर घराचा ताबा न देणाऱ्या बिल्डरवर मोठी कारवाई केली आहे. ४४.३६ लाख रुपये किमतीच्या फ्लॅटचा ताबा देण्यात तब्बल १८ महिन्यांचा उशीर झाल्याने, अथॉरिटीने बिल्डरला खरेदीदाराला १०.७% प्रतिवर्ष दराने व्याज देण्याचे आदेश दिले आहेत. हे व्याज पझेशनची मुदत संपल्यापासून ते प्रत्यक्ष ताबा मिळेपर्यंतच्या कालावधीसाठी मोजले जाणार आहे.
कोरोनाचे कारण ठरले फोल
सुनावणीदरम्यान बिल्डरने कोरोना महामारी आणि कामगारांची टंचाई याचे कारण पुढे करत स्वतःचा बचाव करण्याचा प्रयत्न केला. मात्र, RERA ने हे सर्व युक्तिवाद फेटाळून लावले. करार हा महामारीचा काळ संपल्यानंतर झाला होता, त्यामुळे बिल्डर या विलंबासाठी महामारीला जबाबदार धरू शकत नाही, असे स्पष्ट निरीक्षण अथॉरिटीने नोंदवले.
३० हजारांची 'डेब्रिस फी' रद्द
या वादात बिल्डरने खरेदीदाराकडून ३०,००० रुपये 'डेब्रिस फी' म्हणून वसूल करण्याचा प्रयत्न केला होता. मात्र, मूळ विक्री करारात (Agreement of Sale) याचा कुठेही उल्लेख नसल्याने, RERA ने ही आकारणी अवैध ठरवली आहे. आता बिल्डरला हे पैसेही परत करावे लागणार आहेत.
खरेदीदारांसाठी धडा
बिल्डरला ६० दिवसांच्या आत व्याजाची थकबाकी चुकती करण्याचे आदेश देण्यात आले आहेत. घर खरेदी करू इच्छिणाऱ्या गुंतवणूकदारांनी कोणत्याही मालमत्तेच्या करारावर स्वाक्षरी करण्यापूर्वी त्यातील प्रत्येक क्लॉज, मेंटेनन्स शुल्क आणि इतर छुपे खर्च बारकाईने तपासून पाहणे किती महत्त्वाचे आहे, हे या निर्णयावरून सिद्ध झाले आहे.