RERA ॲक्ट, २०१६ अंतर्गत घरखरेदीदार आता बिल्डर्सना धारेवर धरू शकतात. जर बुकींगच्या वेळी दिलेले एमिनिटीज (Amenities) वेळेत मिळाले नसतील, तर तुम्ही रितसर कायदेशीर मार्गाने दाद मागू शकता.
जेव्हा एखादा बिल्डर घराच्या बुकिंगवेळी दिलेले जिमला (Gym), स्विमिंग पूल किंवा गार्डन यांसारख्या सुविधा वेळेत देत नाही, तेव्हा तो एक प्रकारचा करारभंग असतो. 'रियल इस्टेट (रेग्युलेशन अँड डेव्हलपमेंट) ॲक्ट, २०१६' (RERA) घरखरेदीदारांना अशा वेळी कायदेशीर संरक्षण देते. बिल्डरला मंजूर केलेले प्रोजेक्ट प्लॅन्स आणि 'ॲग्रीमेंट फॉर सेल'मध्ये नमूद केलेल्या अटींचे पालन करणे बंधनकारक आहे.
ॲग्रीमेंट फॉर सेलचे महत्त्व
कोणत्याही घरखरेदीदारासाठी 'रजिस्टर्ड ॲग्रीमेंट फॉर सेल' हा सर्वात महत्त्वाचा दस्तऐवज आहे. मार्केटिंगसाठी वापरल्या जाणाऱ्या जाहिरातींपेक्षा न्यायालयांमध्ये सह्या केलेल्या कराराला जास्त महत्त्व दिले जाते. जर या सुविधा करारात किंवा मंजूर प्लॅनमध्ये असतील, तर बिल्डर त्या नाकारू शकत नाही. तुम्ही तुमच्या प्रोजेक्टचे मंजूर प्लॅन RERA च्या अधिकृत वेबसाईटवर तपासू शकता.
तक्रार कशी कराल?
बिल्डरशी केवळ तोंडी चर्चा करून उपयोग होत नाही. सर्वप्रथम, बिल्डरला रजिस्टर्ड पोस्ट किंवा ईमेलद्वारे कायदेशीर नोटीस (Formal Notice) पाठवून सुविधा पूर्ण करण्यासाठी स्पष्ट मुदत द्या. यामुळे एक पुरावा तयार होतो. जर तरीही बिल्डरने प्रतिसाद दिला नाही, तर तुम्ही राज्य RERA ऑथॉरिटीकडे किंवा ग्राहक न्यायालयात (Consumer Forum) तक्रार दाखल करू शकता.
सामूहिक कारवाईचा पर्याय
वैयक्तिक तक्रारीपेक्षा 'रेसिडेंट्स वेलफेअर असोसिएशन' (RWA) च्या माध्यमातून केलेली कारवाई अधिक प्रभावी ठरू शकते. तक्रार दाखल करताना जागेचे फोटो, व्हिडिओ आणि ब्रोशर यांसारखे पुरावे गोळा करणे अत्यंत आवश्यक आहे. यामुळे RERA अधिकाऱ्यांसमोर तुमची बाजू अधिक भक्कम होते.
सावधगिरी आणि सल्ला
RERA कायद्याचे संरक्षण असले तरी ही कायदेशीर प्रक्रिया वेळखाऊ असू शकते. बिल्डर अनेकदा तांत्रिक कारणे पुढे करून वेळ मारून नेण्याचा प्रयत्न करतात. त्यामुळे कोणतीही कायदेशीर प्रक्रिया सुरू करण्यापूर्वी प्रॉपर्टी कायद्यातील तज्ज्ञांचा सल्ला घेणे नेहमीच हिताचे ठरते.