परदेशात UPI वापरताय? प्रवासाला निघण्यापूर्वी हे नियम नक्की वाचा

भारतीय पर्यकांसाठी आता १० देशांमध्ये UPI सुविधा उपलब्ध झाली आहे. यामध्ये भूतान, नेपाळ, श्रीलंका, सिंगापूर, युएई, फ्रान्स, मॉरिशस, कतार, ग्रीस आणि कंबोडिया यांचा समावेश आहे. पण परदेशात वापरताना काही तांत्रिक आणि आर्थिक बाबींची काळजी घेणे अत्यंत महत्त्वाचे आहे.

व्यवहारांवर लागणारे छुपे चार्जेस (Hidden Fees)

परदेशात UPI वापरताना फॉरेक्स मार्कअप फी (Forex Markup Fee) द्यावी लागते, जी साधारणपणे व्यवहाराच्या १% ते ३.५% इतकी असते. ही फी तुम्हाला थेट पेमेंट करताना दिसत नाही, त्यामुळे तुमचे बजेट बिघडू शकते. याउलट, फॉरेक्स कार्ड्स किंवा क्रेडिट कार्ड्सचा वापर काही बाबतीत अधिक किफायतशीर ठरू शकतो.

प्रवासापूर्वीची तयारी

घरातून निघण्यापूर्वी तुमच्या बँकिंग ॲपमध्ये जाऊन 'UPI International' हे फिचर मॅन्युअली ॲक्टिव्हेट करणे आवश्यक आहे. काही बँका हे फिचर मर्यादित काळासाठीच उपलब्ध करून देतात, त्यामुळे प्रवासाच्या तारखा लक्षात घेऊन ते तपासावे.

याशिवाय, हे व्यवहार Reserve Bank of India (RBI) च्या 'लिबरलाइज्ड रेमिटन्स स्कीम' (LRS) नियमावलीच्या अंतर्गत येतात. मोठे व्यवहार करताना या मर्यादेचे भान ठेवणे आवश्यक आहे.

पेमेंटचे पर्यायी मार्ग ठेवा (Always Have Backup)

UPI हे केवळ एक पूरक साधन (Supplementary Method) म्हणून वापरावे. परदेशातील अनेक लहान दुकानदारांकडे अजूनही UPI स्कॅनिंगची सुविधा नाही. तसेच, इंटरनेट कनेक्टिव्हिटी किंवा तांत्रिक बिघाड झाल्यास तुम्ही अडचणीत येऊ शकता. त्यामुळे प्रवासाला निघताना आंतरराष्ट्रीय क्रेडिट कार्ड किंवा फॉरेक्स कार्ड (Forex Card) सोबत ठेवणे नेहमीच सुरक्षित राहील.