Employees' Provident Fund Organisation (EPFO) ने आपल्या पोर्टलवर चुकीचे 'Member ID' (MID) काढून टाकण्याची सुविधा दिली आहे. मात्र, ही प्रक्रिया करताना अत्यंत सावधगिरी बाळगणे आवश्यक आहे, कारण एकदा का हे आयडी डी-लिंक झाले की त्या खात्यातील सर्व रक्कम कायमस्वरूपी गमावण्याचा धोका असतो.
जर तुमच्या UAN खात्याशी चुकीचे Member ID जोडले गेले असेल, तर PF सेटलमेंट किंवा ट्रान्सफर करताना अडचणी येऊ शकतात. ही समस्या सोडवण्यासाठी EPFO च्या अधिकृत पोर्टलवर जाऊन तुम्ही ते रेकॉर्ड हटवण्यासाठी विनंती करू शकता. ही प्रक्रिया पूर्णपणे आधार-आधारित (Aadhaar-based) असून, ती ओटीपी व्हेरिफिकेशनद्वारे सुरक्षित केली जाते.
प्रक्रिया आणि खबरदारी
पोर्टलवर लॉग इन केल्यानंतर 'View' किंवा 'Service History' पर्यायामध्ये जाऊन तुम्ही सर्व लिंक केलेली खाती पाहू शकता. चुकीचे आयडी काढून टाकण्यासाठी तुम्हाला कारण द्यावे लागते आणि त्यानंतर पुन्हा आधार ओटीपीद्वारे आपली संमती नोंदवावी लागते.
सर्वात महत्त्वाचे म्हणजे, ही प्रक्रिया कायमस्वरूपी (Irreversible) आहे. एकदा का तुम्ही मेंबर आयडी डी-लिंक केला की, त्या आयडीशी संबंधित सर्व फंड्स, व्याज आणि सर्व्हिस हिस्ट्री कायमची नष्ट होते. त्यामुळे ज्या खात्यात थोडीही रक्कम शिल्लक आहे, असे खाते चुकूनही डी-लिंक करू नका.
पात्रतेचे नियम
ही सुविधा सर्वांसाठी उपलब्ध नाही. जर तुमच्या जॉइनिंगची तारीख ३१ डिसेंबर २०१६ च्या आधी असेल, किंवा त्या खात्यावर आधीच काही क्लेम्स सेटल झाले असतील, तर तुम्ही ती खाती ऑटोमेटेड पद्धतीने काढू शकत नाही. तसेच, जर खात्यावर सहापेक्षा जास्त वेळा कॉन्ट्रिब्युशन जमा झाले असेल, तर सिस्टम ती विनंती नाकारू शकते.
जर सिस्टमने तुमची विनंती फेटाळली, तर तुम्हाला तुमच्या रिजनल ऑफिसशी संपर्क साधावा लागेल. अशा वेळी तुम्हाला अपाॅइंटमेंट लेटर किंवा सॅलरी स्लिप्स यांसारखे पुराव्याचे दस्तऐवज सादर करावे लागतील.