रिटायरमेंटच्या काळात होम लोनचा बोजा असणे आर्थिक ओढाताण निर्माण करू शकते. साठवलेली पुंजी वापरून कर्जमुक्त व्हायचे की लिक्विडिटी जपायची, याचा निर्णय घेताना खबरदारी घेणे आवश्यक आहे.
निवृत्तीनंतरचे आयुष्य शांततेत घालवण्यासाठी आपण नोकरीच्या काळातच तयारी करत असतो. अनेकांना रिटायरमेंटच्या वेळी डोक्यावर कर्जाचा बोजा नको असतो, त्यामुळे ते आपली सर्व बचत होम लोन फेडण्यासाठी वापरतात. मात्र, हा निर्णय घेण्यापूर्वी काही महत्त्वाच्या बाबींचा विचार करणे गरजेचे आहे.
मासिक हप्त्याचा परिणाम
नोकरीच्या काळात पगार मिळत असल्याने EMI भरणे सोपे असते, पण निवृत्तीनंतर उत्पन्न मर्यादित होते. पेन्शन किंवा इतर उत्पन्नातून दरमहा EMI कापला गेल्याने हातातील पैसा (Disposable Income) कमी होतो. महागाई वाढत असताना आरोग्याचा खर्च आणि दैनंदिन गरजांसाठी पुरेसा पैसा हातात असणे अत्यंत आवश्यक आहे. अशा वेळी कर्ज फेडणे गरजेचे वाटते, पण त्यामुळे तुमच्या जगण्याचा दर्जा घसरणार नाही याची काळजी घ्यावी.
लिक्विडिटी म्हणजे सुरक्षितता
अनेकांना वाटते की घर नावावर पूर्णपणे होणे म्हणजे सुरक्षितता, पण आर्थिक भाषेत 'लिक्विडिटी' (हातचा पैसा) जास्त महत्त्वाची असते. घर ही एक 'फिक्स्ड ॲसेट' आहे, जी गरजेच्या वेळी लगेच विकता येत नाही. जर तुम्ही तुमची सर्व गुंतवणूक कर्ज फेडण्यासाठी वापरली आणि अचानक मेडिकल इमर्जन्सी आली, तर तुम्ही संकटात सापडू शकता. त्यामुळे कर्ज फेडण्यापूर्वी एक भक्कम इमर्जन्सी फंड बाजूला ठेवणे अत्यंत अनिवार्य आहे.
गुंतवणुकीचा परतावा विरुद्ध कर्जाचा व्याजदर
कर्ज फेडण्यापूर्वी गणित मांडा. जर तुमच्या कर्जाचा व्याजदर कमी असेल, तर तीच रक्कम अशा ठिकाणी गुंतवा जिथून तुम्हाला कर्जाच्या व्याजापेक्षा जास्त परतावा मिळू शकेल. मात्र, गुंतवणुकीतील जोखीम आणि कर्जाचे निश्चित व्याजदर यांची तुलना करणे महत्त्वाचे आहे. ज्यांना जोखीम घ्यायची नाही, त्यांना कर्जमुक्त राहणे अधिक सोयीचे वाटते.
RBI चे नियम आणि अटी
कोणताही मोठा निर्णय घेण्यापूर्वी तुमच्या लोन एग्रीमेंटमधील अटी नीट वाचा. RBI च्या मार्गदर्शक सूचनांनुसार, फ्लोटिंग रेटच्या वैयक्तिक कर्जावर बँक सामान्यतः प्री-पेमेंट पेनल्टी आकारू शकत नाही. मात्र, तुमच्या कर्जाच्या अटी आणि उर्वरित कालावधी तपासल्यास तुम्ही अतिरिक्त खर्च वाचवू शकता.