१ ऑक्टोबर २०२६ पासून निवासी व्यक्ती आणि HUF ला NRI कडून मालमत्ता खरेदी करताना TAN मिळवण्याची गरज नाही. आता तुम्ही थेट PAN कार्ड वापरून फॉर्म १४१ द्वारे TDS भरू शकता, मात्र १२.५% टॅक्स दर कायम आहे.
काय आहे नवा नियम?
आतापर्यंत NRI कडून मालमत्ता खरेदी करताना 'टॅक्स डिडक्शन अँड कलेक्शन अकाउंट नंबर' (TAN) मिळवणे ही एक मोठी कटकट होती. यामुळे व्यवहाराला १० दिवसांपर्यंत विलंब होऊ शकत असे. पण आता प्राप्तिकर विभागाने (Income Tax Department) ही अट शिथिल केली असून, आता तुम्ही केवळ स्वतःच्या 'पर्मनंट अकाउंट नंबर' (PAN) चा वापर करून TDS भरू शकता.
नवीन प्रक्रिया कशी असेल?
१. फॉर्म १४१ चा वापर: आता टॅक्स भरण्यासाठी तुम्हाला फॉर्म १४१ चा वापर करावा लागेल. यामध्ये 'शेड्युल ई' (Schedule E) नावाचा नवीन विभाग समाविष्ट केला आहे, जो पेमेंट चलन आणि स्टेटमेंट म्हणून काम करेल.
२. कालावधी: टॅक्स कपात झाल्यापासून ३० दिवसांच्या आत हा टॅक्स जमा करणे अनिवार्य आहे.
३. TDS सर्टिफिकेट: व्यवहाराची पूर्तता करण्यासाठी तुम्हाला NRI विक्रेत्याला 'फॉर्म १३२' अंतर्गत TDS सर्टिफिकेट देणे गरजेचे आहे.
खबरदारी घेणे का आवश्यक आहे?
हा बदल केवळ प्रशासकीय असून टॅक्सच्या दरात कोणताही बदल झालेला नाही. NRI कडून मालमत्ता खरेदी करताना १२.५% TDS दर (अधिक सरचार्ज आणि सेस) लागू राहील. जर तुम्ही नियमांचे पालन केले नाही, तर प्राप्तिकर विभाग तुमच्यावर कारवाई करू शकतो. कोणत्याही त्रुटीसाठी १% मासिक व्याजाचा दंड आकारला जाऊ शकतो, तर गंभीर प्रकरणांमध्ये हा दंड टॅक्स रकमेइतकाही असू शकतो.
महत्त्वाची टीप: ही सवलत केवळ निवासी व्यक्ती आणि 'हिंदू अविभक्त कुटुंबांना' (HUF) लागू आहे. कंपन्या, LLP आणि इतर व्यावसायिक संस्थांना मात्र आजही TAN मिळवण्याची जुनीच प्रक्रिया फॉलो करावी लागेल.