NTA च्या परीक्षा पद्धतीत आता अमूलाग्र बदल होण्याची शक्यता आहे. संसदीय शिक्षण समितीने पाठांतराऐवजी संकल्पनात्मक (Conceptual) शिक्षणावर भर देण्याची शिफारस केली असून, याचा फटका खासगी कोचिंग इंडस्ट्रीला बसू शकतो.
संसदीय शिक्षण समितीने NTA च्या सध्याच्या परीक्षा पद्धतीवर जोरदार टीका केली आहे. समितीच्या मते, JEE, NEET आणि CUET सारख्या महत्त्वाच्या परीक्षा सध्या पूर्णपणे पाठांतरावर आधारित बनल्या आहेत. प्रश्नपत्रिकांचे स्वरूप ठरलेले असल्यामुळे विद्यार्थ्यांमध्ये तर्कापेक्षा पाठांतराची सवय वाढली आहे, ज्याचा फायदा खासगी कोचिंग सेंटर्स उचलत आहेत.\n\nकोचिंग सेंटर्सनी परीक्षेच्या ठरलेल्या पॅटर्नचा वापर करून एक समांतर शिक्षण व्यवस्थाच निर्माण केली आहे. यामुळे विद्यार्थ्यांच्या मूळ बुद्धिमत्तेपेक्षा 'शॉर्टकट'ला अधिक महत्त्व मिळत असल्याचे निरीक्षण समितीने नोंदवले आहे. आता NTA ला या परीक्षा अधिक संकल्पनात्मक बनवण्याच्या सूचना देण्यात आल्या आहेत.\n\nकोचिंग क्षेत्रावर काय परिणाम होईल?\n\nजर NTA ने भविष्यात प्रश्नपत्रिकांचे स्वरूप पूर्णपणे बदलले, तर कोचिंग इंडस्ट्रीच्या व्यवसायावर याचा थेट परिणाम होऊ शकतो. ज्या कंपन्यांचा नफा ठराविक परीक्षा पॅटर्नच्या प्रशिक्षणावर अवलंबून आहे, त्यांच्या बिझनेस मॉडेलसमोर हे मोठे आव्हान असेल. सध्या NTA वर विश्वासार्हतेचे प्रश्न निर्माण झाले असताना, या सुधारणा कितपत प्रभावी ठरतात, यावर आता गुंतवणूकदारांचे लक्ष लागले आहे.