WhatsApp वर येणाऱ्या एका बनावट बँक अलर्टमुळे नागरिकांचे मोठे नुकसान होऊ शकते. हायदराबाद पोलिसांनी सावधगिरीचा इशारा दिला असून, चुकूनही 'NO' असा रिप्लाय दिल्यास तुमच्या बँक खात्यावर सायबर गुन्हेगारांचा ताबा जाऊ शकतो.
काय आहे नेमकी फसवणूक?
हायदराबाद पोलिसांनी दिलेल्या माहितीनुसार, सायबर भामटे युजर्सना अनोळखी क्रमांकावरून बनावट ट्रान्झॅक्शन अलर्ट पाठवत आहेत. तुमच्या खात्यातून पैसे कापले गेल्याचे सांगून हे मेसेज भीती निर्माण करतात. यामध्ये तुम्हाला विचारले जाते की, 'जर हे ट्रान्झॅक्शन तुम्ही केले नसेल, तर NO टाईप करून रिप्लाय द्या.' जसा तुम्ही 'NO' असा मेसेज पाठवता, तसा एक मालवेअर स्क्रिप्ट (Malware Script) सक्रिय होतो आणि तुमच्या फोनचा ताबा थेट गुन्हेगारांच्या हातात जातो.
बँकिंग ॲप्सना धोका
पारंपारिक फिशिंगमध्ये लिंकवर क्लिक करावे लागते, पण या नव्या प्रकारात केवळ रिप्लाय दिल्याने तुमचा फोन हॅक होतो. हे मालवेअर तुमच्या फोनमधील बँकिंग ॲप्सच्या सुरक्षा भिंती ओलांडून खात्यातील सर्व रक्कम लंपास करण्याची क्षमता ठेवते. डिजिटल पेमेंटच्या वाढत्या वापरासोबतच अशा सायबर जोखमीही वाढत असल्याचे दिसून येत आहे.
महत्त्वाची सुरक्षितता टिप्स
कोणतीही अधिकृत बँक व्हॉट्सॲपवरून व्यवहार पडताळणी किंवा वाद सोडवत नाही. त्यामुळे:
- अनोळखी क्रमांकावरून आलेल्या आर्थिक मेसेजला प्रतिसाद देऊ नका.
- संशयास्पद मेसेज आल्यास तात्काळ तो नंबर Block करा आणि चॅट Delete करा.
- बँकेशी संबंधित कोणत्याही तक्रारीसाठी फक्त त्यांच्या अधिकृत Mobile App किंवा अधिकृत कस्टमर केअरचा वापर करा.
जर तुम्हाला फसवणूक झाल्याचा संशय येत असेल, तर विलंब न करता नॅशनल सायबर क्राईम हेल्पलाइन नंबर 1930 वर तात्काळ संपर्क साधा. वेळेवर तक्रार केल्यास फसवणुकीची रक्कम गोठवणे (Freeze) प्रशासनाला शक्य होऊ शकते.