अरुणाचल प्रदेशातील भारत-म्यानमार सीमेजवळ आसाम रायफल्सच्या तुकडीवर झालेल्या हल्ल्यात एक जवान शहीद झाला असून, चार जण जखमी झाले आहेत. चँगलांग जिल्ह्यात सुरक्षा दलांनी आता सर्च ऑपरेशन तीव्र केले आहे.
मंगळवारी पहाटे अरुणाचल प्रदेशातील चँगलांग जिल्ह्यात ही दुर्दैवी घटना घडली. सकाळी ६:३० च्या सुमारास आसाम रायफल्सची टीम नामपोंग नाला परिसरात सीमा कुंपणाच्या कामाचे निरीक्षण करत असताना दहशतवाद्यांनी अचानक हल्ला केला. हा भाग दुर्गम आणि घनदाट जंगलांचा असल्याने सुरक्षा दलांसमोर आव्हाने उभी राहिली आहेत.
या चकमकीत ४२ वर्षीय हवालदार जनखोकाई कुकी (Jankhokai Kuki) हे वीरगतीला प्राप्त झाले, तर अन्य ४ जवान गंभीर जखमी झाले आहेत. त्यांना उपचारासाठी तातडीने रुग्णालयात हलवण्यात आले असून, परिसरात सुरक्षा व्यवस्था कडक करण्यात आली आहे.
कोणाचा आहे हात?
प्राथमिक माहितीनुसार, या हल्ल्यामागे नॅशनल सोशलिस्ट कौन्सिल ऑफ नागालँड (NSCN-K-YA) या संघटनेचा हात असण्याची शक्यता वर्तवण्यात येत आहे. म्यानमार सीमेवरील मोकळ्या आणि घनदाट जंगलांचा वापर करून हे दहशतवादी वारंवार भारतीय हद्दीत घुसखोरी करण्याचा प्रयत्न करत असतात.
या घटनेमुळे सीमावर्ती भागातील पायाभूत सुविधांच्या कामावर परिणाम होण्याची शक्यता आहे. म्यानमार सीमेवर भारताचे महत्त्वाचे कुंपण आणि कनेक्टिव्हिटी प्रोजेक्ट्स सुरू आहेत, ज्यांच्या वेळेवर पूर्ण होण्यावर या सुरक्षेच्या आव्हानांचा मोठा प्रभाव पडणार आहे.