तेलंगणातील अन्न सुरक्षा विभागाने (TG SAFE) Swiggy Instamart, Flipkart आणि Zepto च्या चार डार्क स्टोअर्सवर कडक कारवाई करत त्यांचे परवाने निलंबित केले आहेत. हायजीन नियमांचे उल्लंघन झाल्यामुळे ही मोठी कारवाई करण्यात आली आहे.
नियम धाब्यावर बसवल्याने कारवाई
तेलंगणा फूड सेफ्टी विभागाने हैदराबादमधील एकूण १६ सुविधांची अचानक तपासणी केली होती. या तपासणीत धक्कादायक बाबी समोर आल्या आहेत. तपासणी दरम्यान काही डार्क स्टोअर्समध्ये उंदीर, झुरळांचा प्रादुर्भाव, बुरशी लागलेल्या भाज्या आणि एक्सपायर झालेली उत्पादने सापडली. कोल्ड स्टोरेजची अवस्थाही अत्यंत खराब असून, तिथे स्वच्छता नसल्याचे दिसून आले.
इतर स्टोअर्सना नोटीस
केवळ चार स्टोअर्सचे परवाने निलंबित करून प्रशासन थांबलेले नाही. विभागाने इतर ५ आऊटलेट्सना 'शो-कॉज नोटीस' बजावली असून, ३ केंद्रांना सुधारणेच्या नोटिसा दिल्या आहेत. तसेच, भेसळीची शक्यता तपासण्यासाठी एकूण १५ खाद्यपदार्थांचे नमुने जप्त करण्यात आले आहेत.
क्विक-कॉमर्स क्षेत्रासाठी धोक्याची घंटा
या कारवाईमुळे गुंतवणूकदारांमध्ये चिंतेचे वातावरण आहे. आतापर्यंत नियामक संस्थांचे लक्ष केवळ रेस्टॉरंट किंवा रिटेल दुकानांवर असायचे, मात्र आता 'क्विक-कॉमर्स'च्या बॅकएंड इन्फ्रास्ट्रक्चरवर (डार्क स्टोअर्स) सरकारचा कडक वॉच वाढला आहे. या कंपन्यांना आता वेगाने डिलिव्हरी करण्यासोबतच स्वच्छतेच्या मानकांचे पालन करण्यासाठी मोठ्या प्रमाणावर गुंतवणूक करावी लागणार आहे. जर कंपन्यांनी आपल्या सुरक्षा प्रोटोकॉलमध्ये सुधारणा केली नाही, तर भविष्यात व्यवसायावर मोठा परिणाम होण्याची शक्यता नाकारता येणार नाही.