ICICI Bank ने सोन्याच्या किमतींबाबत एक मोठा रिपोर्ट जारी केला आहे. २०२७ पर्यंत सोने ५,००० डॉलर प्रति औंसचा टप्पा गाठू शकते, असे संकेत देण्यात आले आहेत. दरम्यान, भारतात वाढत्या किमतींमुळे दागिन्यांची मागणी कमी होऊन Gold ETF कडे गुंतवणूकदारांचा ओढा वाढला आहे.
सोन्याच्या किमतीतील वाढीची कारणे
ICICI Bank च्या रिपोर्टनुसार, २०२७ च्या पहिल्या सहामाहीपर्यंत सोन्याचे दर ५,००० डॉलर प्रति औंसपर्यंत झेप घेऊ शकतात. सध्या सोन्याचे दर 'कन्सोलिडेशन' फेजमध्ये असून २०२६ च्या अखेरपर्यंत ते ४,२०० ते ४,६०० डॉलर दरम्यान राहण्याची शक्यता आहे. हे केवळ तात्पुरते स्थैर्य असून दीर्घकालीन कल तेजीचाच आहे. अमेरिकेतील महागाई कमी होणे आणि डॉलर कमकुवत होणे ही मुख्य कारणे सोन्याच्या तेजीला आधार देत आहेत.
जागतिक बाजारातील हालचाली
जगभरातील मध्यवर्ती बँका, विशेषतः 'पीपल्स बँक ऑफ चायना', आपला डॉलरचा साठा कमी करून सोन्यामध्ये गुंतवणूक वाढवत आहेत. अमेरिकेतील वाढता वित्तीय तूट (Fiscal Deficit) हे देखील सोन्याच्या किमतींना आधार देणारे एक महत्त्वाचे फॅक्टर ठरत आहे. मात्र, सप्टेंबर २०२६ मध्ये अमेरिकेतील व्याजदरांबाबतच्या अनिश्चिततेमुळे सोन्याच्या किमतीत ८% पर्यंत घसरण झाली होती. उच्च व्याजदर हे सोन्याच्या तेजीचे सर्वात मोठे शत्रू मानले जातात, कारण सोन्यावर कोणतीही व्याजाची किंवा डिव्हिडंडची कमाई होत नाही.
भारतीय गुंतवणूकदारांसाठी काय आहे संधी?
भारतात सोन्याच्या किमती केवळ जागतिक संकेतच नाही, तर रुपयाच्या मूल्यावरही अवलंबून आहेत. ICICI Bank नुसार, २०२६ च्या अखेरपर्यंत भारतात सोन्याचे दर प्रति १० ग्रॅम ₹१.४० लाख ते ₹१.६० लाख या रेंजमध्ये राहू शकतात. वाढत्या किमतींमुळे ग्राहकांनी प्रत्यक्ष दागिने खरेदी करण्याऐवजी Gold ETFs सारख्या पर्यायांकडे आपला मोर्चा वळवला आहे. सुरक्षा आणि स्टोअरेजच्या समस्यांमुळे गुंतवणूकदार आता 'डिजिटल' गोल्डला पसंती देत आहेत.
गुंतवणूकदारांनी कोणत्या धोक्यांकडे लक्ष द्यावे?
जर अमेरिकेतील महागाईचे आकडे चिवट राहिले, तर फेडरल रिझर्व्ह व्याजदर जास्त काळ वाढवून ठेवू शकते. यामुळे सोन्याच्या किमती काही काळासाठी मर्यादित राहू शकतात किंवा त्यात अल्पकालीन घसरण होऊ शकते. गुंतवणूकदारांनी अमेरिकेच्या फेडरल रिझर्व्हची धोरणे आणि चलनवाढीच्या आकडेवारीवर बारीक नजर ठेवणे गरजेचे आहे.