फेब्रुवारी २०२६ पासून जागतिक बाजारात कच्च्या तेलाचा साठा तब्बल **५०७ दशलक्ष बॅरल्सने** कमी झाला आहे. पुरवठा आणि मागणीतील ही मोठी दरी आता किमती वाढवण्यास आणि महागाईला निमंत्रण देत आहे.
जागतिक ऊर्जा बाजार सध्या एका कठीण टप्प्यातून जात आहे. फेब्रुवारी २०२६ मध्ये सुरू झालेल्या संघर्षानंतर, मागणी पूर्ण करण्यासाठी जगाने साठ्यातून ५०७ दशलक्ष बॅरल्स तेल वापरले आहे. उत्पादन केंद्रांवरील हल्ले आणि पायाभूत सुविधांचे नुकसान यामुळे पुरवठा साखळी विस्कळीत झाली असून, उत्पादन वाढीला मर्यादा आल्या आहेत.
सप्लायवर का आलाय दबाव?
स्ट्रेट ऑफ हॉर्मुझ आणि बाब-अल-मंदेब सारख्या महत्त्वाच्या व्यापारी मार्गांवर होत असलेल्या संघर्षामुळे टँकर वाहतुकीवर मोठा परिणाम झाला आहे. २०२६ मध्ये जागतिक तेल पुरवठा मागील वर्षाच्या तुलनेत दररोज ५.७ दशलक्ष बॅरल्सने घटण्याचा अंदाज आहे. यामुळे जग आता नवीन उत्पादनापेक्षा साठवलेल्या तेलावर (Reserves) जास्त अवलंबून आहे.
गुंतवणूकदारांसाठी धोक्याची घंटा
साठवलेले तेल हे बाजारासाठी 'शॉक ॲब्जॉर्बर'चे काम करते. मात्र, तज्ज्ञांच्या मते पुढील ६ ते ९ महिन्यांत हा साठा एका गंभीर पातळीपर्यंत खाली येऊ शकतो. जेव्हा हा बफर संपतो, तेव्हा बाजारात किमती प्रचंड वाढू शकतात, ज्याला 'प्राइस-इंड्युस्ड डिमांड डिस्ट्रक्शन' म्हटले जाते.
कच्च्या तेलाच्या किमती $१०० प्रति बॅरलच्या आसपास किंवा त्यापेक्षा वर राहिल्यास मॅन्युफॅक्चरिंग, वाहतूक आणि रिटेल क्षेत्रातील कंपन्यांच्या नफ्यावर मोठा परिणाम होईल. वाढत्या ऊर्जा खर्चामुळे महागाईचा भडका उडू शकतो, त्यामुळे बाजारातील अस्थिरतेवर लक्ष ठेवणे आता गुंतवणूकदारांसाठी अनिवार्य ठरले आहे.