ग्लोबल ब्रोकरेज फर्म Macquarie ने भारतीय शेअर बाजारातील प्रमुख एक्सचेंज कंपन्यांवर सकारात्मक कल दर्शवला आहे. NSE, BSE आणि MCX साठी 'Outperform' रेटिंग देत मोठी टार्गेट प्राईस जाहीर केली आहे.
ग्लोबल ब्रोकरेज फर्म Macquarie ने भारताच्या मार्केट इन्फ्रास्ट्रक्चर कंपन्यांवर पहिल्यांदाच कव्हरेज सुरू केले असून NSE, BSE आणि MCX साठी 'Outperform' रेटिंग दिले आहे. NSE लवकरच शेअर बाजारात लिस्ट होणार असल्याने या क्षेत्रातील हालचालींवर गुंतवणूकदारांचे लक्ष लागले आहे.
NSE चे टार्गेट
Macquarie ने NSE साठी ₹1,965 ची टार्गेट प्राईस निश्चित केली आहे, जी आयपीओच्या ₹1,785 च्या अंदाजापेक्षा सुमारे 10% जास्त आहे. NSE कडे असलेली बाजारातील मक्तेदारी आणि मजबूत लिक्विडीटी हे त्यांच्या तेजीमागचे मुख्य कारण असल्याचे विश्लेषकांचे मत आहे.
BSE आणि MCX वरही मोठा भरवसा
केवळ NSEच नाही, तर BSE साठी ₹4,000 चे टार्गेट देण्यात आले आहे, जे सध्याच्या किमतीपेक्षा 20% हून अधिक परताव्याची शक्यता दर्शवते. इंडेक्स ऑप्शन्समध्ये BSE करत असलेला विस्तार त्यांना स्पर्धेत पुढे नेण्यास मदत करत आहे. तसेच, MCX साठी ₹3,820 चे टार्गेट दिले असून, कमोडिटी मार्केटमधील त्यांचा दबदबा आणि वाढता नफा कंपनीसाठी सकारात्मक ठरत आहे.
गुंतवणूकदारांनी काय लक्षात घ्यावे?
एक्सचेंज कंपन्या म्हणजे बाजारातील टोल नाके आहेत, जिथे प्रत्येक व्यवहारावर कमाई होते. कमी खर्च आणि उच्च मार्जिनमुळे या कंपन्या गुंतवणूकदारांना आकर्षित करतात. मात्र, सरकारी धोरणातील बदल, नियमांमधील कडकपणा आणि तांत्रिक बिघाड हे या क्षेत्रातील मुख्य धोके आहेत. गुंतवणूक करताना NSE ची लिस्टिंग प्रक्रिया, BSE चा डेरिव्हेटिव्ह मार्केटमधील वाटा आणि MCX चे नवनवीन प्रॉडक्ट्स यावर लक्ष ठेवणे गरजेचे आहे.