Manipur ke budget ko lekar CAG ki report ne sabko hila diya hai! State ne lagbhag ₹8,927.55 crore kharch hi nahi kiye, jiske wajah se infrastructure projects atke pade hain.
Budget ka paisa kahan gaya?
CAG ki 2024-25 report mein ek shocking khulasa hua hai. Manipur government ne jo budget allocate kiya tha, uska ₹8,927.55 Crore hissa bina kharch kiye hi pada raha, jo ki 23.88% ka bada gap hai. Iska matlab saaf hai—development ki planning toh hui, par ground level par kaam ki raftar bahut dhimi rahi.
Infrastructure projects hue fail
Sabse badi dikkat Capital Expenditure mein dikhi hai. Total ₹8,989.60 Crore ke budget ke samne sirf ₹2,704.23 Crore hi use ho paye. Matlab ₹6,200 Crore se zyada ka paisa system mein hi fansa hua hai.
Report ke mutabik 138 aise infrastructure projects hain jo abhi tak poore nahi hue, aur inmein ₹473.53 Crore public ka paisa block ho gaya hai. Contractors aur companies ke liye yeh liquidity ka bada issue hai, kyunki payments delay hone ka risk badh gaya hai.
Debt ka badhta bojh
Sirf projects hi nahi, Manipur ka debt bhi tension de raha hai. 2024-25 ke end tak total public debt ₹16,193.78 Crore tak pahunch gaya hai. Jab debt itna zyada ho aur projects stuck rahen, toh naye development ke liye paisa jutana mushkil ho jata hai. Ab sabki nazar government par hai ki wo in atke hue projects ko kaise track par wapas laati hai.