રેડ સી અને બાબ-અલ-મંદેબ સ્ટ્રેટમાં વધતી જતી અસ્થિરતાને પગલે ભારતે આંતરરાષ્ટ્રીય સ્તરે ચિંતા વ્યક્ત કરી છે. વેપારના માર્ગો સુરક્ષિત ન હોવાને કારણે શિપિંગ ફ્રેટ રેટ અને ઈન્સ્યોરન્સ પ્રીમિયમ પર મોટું દબાણ જોવા મળી રહ્યું છે, જેની સીધી અસર ભારતીય એક્સપોર્ટ-ઈમ્પોર્ટ પર પડી રહી છે.
વૈશ્વિક વેપાર માટે અત્યંત મહત્વના મનાતા મધ્ય-પૂર્વના દરિયાઈ માર્ગો પર વધતા જોખમોને લઈને ભારતે સંયુક્ત રાષ્ટ્ર (UN) માં આકરો વલણ અપનાવ્યો છે. ખાસ કરીને બાબ-અલ-મંદેબ સ્ટ્રેટ અને દક્ષિણ રેડ સીમાં સતત સુરક્ષાના પડકારો સર્જાઈ રહ્યા છે, જેના કારણે વેપારી જહાજોની સલામતી જોખમમાં મુકાઈ છે.
આર્થિક અને લોજિસ્ટિકલ અસર
જ્યારે વેપારી જહાજોને સુરક્ષા માટે લાંબા રૂટ અપનાવવા પડે છે, ખાસ કરીને 'કેપ ઓફ ગુડ હોપ' થઈને, ત્યારે મુસાફરીનું અંતર નોંધપાત્ર રીતે વધી જાય છે. આનાથી ફ્યુઅલનો વપરાશ અને શિપિંગ સમય બંને વધે છે, જેનો સીધો બોજ ફ્રેટ રેટ અને ઈન્સ્યોરન્સ પ્રીમિયમમાં વધારા તરીકે જોવા મળે છે. આ અસ્થિરતા મેન્યુફેક્ચરિંગ, એન્જિનિયરિંગ અને કોમોડિટી ટ્રેડિંગ જેવા સેક્ટર્સ માટે મોટી ચિંતાનો વિષય છે.
નવું ગઠબંધન અને સુરક્ષા પગલાં
આ સમસ્યાને પહોંચી વળવા ભારતે 'લાઇબેરિયા' જેવા દેશો સાથે મળીને 'Group of Friends on Safety and Security of Shipping and Seafarers' ની સ્થાપના કરી છે. આ પહેલનો મુખ્ય હેતુ દરિયાઈ ક્રૂની સુરક્ષા, મેડિકલ સહાય અને ઈમરજન્સી ઈવેક્યુએશન માટે એક મજબૂત નેટવર્ક તૈયાર કરવાનો છે.
રોકાણકારો માટે શું મહત્વનું?
બજારના નિષ્ણાતો માને છે કે જ્યાં સુધી આ દરિયાઈ માર્ગો પર સ્થિરતા નહીં આવે ત્યાં સુધી સપ્લાય ચેઈનનો ખર્ચ ઉંચો રહી શકે છે. રોકાણકારોએ હવે શિપિંગ ઈન્ડેક્સ અને ફ્રેટ કોસ્ટ પર નજર રાખવી અનિવાર્ય છે, કારણ કે આ પરિબળો કંપનીઓના માર્જિન પર સીધી અસર કરી શકે છે.