૨૭ ઓક્ટોબર, ૨૦૨૬થી રેલવે કાઉન્ટર પરથી ટિકિટ બુકિંગ કરાવતા મુસાફરોએ ટ્રાવેલ ઈન્સ્યોરન્સ માટે ડિજિટલ પેમેન્ટ જ કરવું પડશે. ૪૫ પૈસાનો પ્રીમિયમ ચાર્જ રોકડમાં લેવો મુશ્કેલ હોવાથી રેલવેએ આ મહત્વનો નિર્ણય લીધો છે.
કેમ લેવાયો આ નિર્ણય?
રેલવેના આ નિર્ણય પાછળનું મુખ્ય કારણ વહીવટી સરળતા છે. ટ્રાવેલ ઈન્સ્યોરન્સનું પ્રીમિયમ માત્ર ૪૫ પૈસા પ્રતિ પેસેન્જર નક્કી કરવામાં આવ્યું છે. હાલના સમયમાં ૫, ૧૦, ૨૦ અને ૨૫ પૈસાના સિક્કા ચલણમાં ન હોવાથી, કાઉન્ટર પર રોકડમાં આટલી નાની રકમની લેવડ-દેવડ કરવી અશક્ય બની ગઈ છે. ડિજિટલ પેમેન્ટ અપનાવવાથી રેલવે કાઉન્ટર પર થતી ભૂલો ઘટશે અને ટિકિટ વિન્ડો પર કામગીરી ઝડપી બનશે.
CRIS અને IRCTC ની તૈયારી
આ આખી ટેકનિકલ પ્રક્રિયા Centre for Railway Information Systems (CRIS) દ્વારા હેન્ડલ કરવામાં આવી રહી છે. તેમણે Passenger Reservation System (PRS) માં જરૂરી અપડેટ્સ કરી દીધા છે. આ સુધારા IRCTC સાથે મળીને અને સુપ્રીમ કોર્ટના નિર્દેશો મુજબ કરવામાં આવ્યા છે. મુસાફરોએ હવે પોલિસીની વિગતો મેળવવા માટે મોબાઈલ નંબર આપવો ફરજિયાત રહેશે.
ઈન્સ્યોરન્સના લાભો
આ ઈન્સ્યોરન્સની સુવિધા ઈ-ટિકિટ ધારકોની જેમ જ કાઉન્ટર ટિકિટ ધારકોને પણ મળશે. જેમાં કન્ફર્મ, RAC અને પાર્શલી કન્ફર્મ ટિકિટ ધરાવતા મુસાફરોને મૃત્યુ કે કાયમી અપંગતાના કિસ્સામાં ₹૧૦ લાખ સુધીનું કવચ મળશે. ઉપરાંત, ટિકિટ કેન્સલ કરવા પર પ્રીમિયમમાંથી માત્ર ૯ પૈસાની કપાત કરવામાં આવશે.
આ પગલું રેલવેના ડિજિટાઈઝેશન અભિયાનનો એક ભાગ છે, જે ઓફલાઈન અને ઓનલાઈન બુકિંગ સિસ્ટમ વચ્ચે એકસમાનતા લાવશે.