જર્મનીની એક અદાલતે ફેસબુક અને ઇન્સ્ટાગ્રામ પર આવતી ફ્રોડ ઈન્વેસ્ટમેન્ટ એડ્સ માટે Meta Platforms ને જવાબદાર ઠેરવી છે. કોર્ટે કંપનીને આ જાહેરાતો હટાવવા, વળતર ચૂકવવા અને તેમાંથી થયેલી કમાણીનો ખુલાસો કરવા આદેશ આપ્યો છે.
એલ્ગોરિધમનું જોખમ અને કોર્ટનો આદેશ
યુરોપમાં Meta માટે નવી કાનૂની મુશ્કેલીઓ ઊભી થઈ છે. જર્મન કોર્ટે સ્પષ્ટ કર્યું છે કે પ્લેટફોર્મ માત્ર એક 'હોસ્ટ' નથી, પરંતુ તે પોતાના એલ્ગોરિધમ દ્વારા કન્ટેન્ટનું નિયંત્રણ કરે છે, તેથી તે વધુ જવાબદાર છે. કોર્ટના મતે, એક ફાઇનાન્સિયલ પોર્ટલ દ્વારા રિપોર્ટ કર્યા બાદ પણ 62 દિવસ સુધી ફ્રોડ જાહેરાતો પ્લેટફોર્મ પરથી દૂર કરવામાં આવી ન હતી, જે ગંભીર બેદરકારી છે.
કંપની સામે શું છે પડકારો?
કોર્ટના આદેશ મુજબ, Meta એ માત્ર આ જાહેરાતો હટાવવાની જ નથી, પરંતુ પીડિતોને વળતર પણ ચૂકવવાનું છે. આ સાથે કંપનીએ આ પ્રકારની ભ્રામક જાહેરાતોમાંથી થયેલી કુલ કમાણીનો ડેટા પણ જાહેર કરવો પડશે. જોકે, Meta એ આ ચુકાદા સામે અસંમતિ દર્શાવી છે અને હવે કાનૂની વિકલ્પો તપાસી રહી છે. હાલમાં આ ચુકાદો અંતિમ નથી અને તે અપીલને પાત્ર છે.
શું આ એક નવો ટ્રેન્ડ છે?
આ આખો મામલો યુરોપિયન યુનિયનના Digital Services Act હેઠળ ટેક કંપનીઓ પર વધી રહેલા દબાણને દર્શાવે છે. અત્યાર સુધી જે 'સેફ હાર્બર' પ્રોવિઝન હેઠળ ટેક કંપનીઓ બચી જતી હતી, તે હવે એલ્ગોરિધમ્સના યુગમાં જોખમમાં મુકાઈ છે. જો અન્ય દેશોની અદાલતો પણ આવો જ અભિગમ અપનાવશે, તો Meta જેવી કંપનીઓએ જાહેરાતોની ચકાસણી માટે મોટો ખર્ચ કરવો પડશે, જે સીધી રીતે તેમની ઓપરેશનલ કોસ્ટ અને પ્રોફિટ માર્જિનને અસર કરી શકે છે.