ભારતીય એન્ટરટેઈનમેન્ટ ટેક સ્ટાર્ટઅપ Eloelo એ હવે પ્રોફેશનલ વીડિયો મેકિંગ માટે Dolphin AI સોફ્ટવેર સ્યુટ લોન્ચ કર્યું છે. આ સાથે કંપની કન્ઝ્યુમર એપમાંથી એન્ટરપ્રાઈઝ સોફ્ટવેર સેક્ટરમાં મોટો બદલાવ લાવી રહી છે.
ભારતીય એન્ટરટેઈનમેન્ટ ટેક ફર્મ Eloelo Group એ અત્યાધુનિક Dolphin AI લોન્ચ કરીને વીડિયો પ્રોડક્શનના ક્ષેત્રમાં મોટું કદમ ઉઠાવ્યું છે. આ નવું એજન્ટિક (Agentic) સોફ્ટવેર વીડિયો બનાવવાની આખી પ્રક્રિયાને ઓટોમેટ કરવાની ક્ષમતા ધરાવે છે. અત્યાર સુધી કન્ઝ્યુમર પ્લેટફોર્મ તરીકે જાણીતી આ કંપની હવે ગ્લોબલ સ્ટુડિયો અને એડવર્ટાઈઝર્સ માટે પ્રોડક્શન ઈન્ફ્રાસ્ટ્રક્ચર પૂરૂ પાડશે.
Dolphin AI ની ખાસિયતો:
આ પ્લેટફોર્મ માત્ર વીડિયો એડિટિંગ જ નહીં, પણ સ્ક્રિપ્ટથી લઈને ફાઈનલ એડિટ સુધીના તમામ કામોને મેનેજ કરે છે. સામાન્ય રીતે AI વીડિયોમાં પાત્ર, કપડાં કે લોકેશનની સાતત્યતા (Visual Continuity) જાળવવી મુશ્કેલ હોય છે, પરંતુ Dolphin AI તેના સ્પેશિયલ ઓર્કેસ્ટ્રેશન લેયર દ્વારા દરેક સીનમાં સ્થિરતા જાળવી રાખે છે.
ટેકનિકલ પાવર:
આ સોફ્ટવેર 'Model Context Protocol' પર બનેલું છે, જેનો અર્થ છે કે તે એકસાથે Google ના Gemini, Anthropic ના Claude અને OpenAI ના ChatGPT સાથે કામ કરી શકે છે. યુઝર્સ કોઈ એક પ્લેટફોર્મ સાથે બંધાયેલા રહેવાને બદલે જરૂરિયાત મુજબ અલગ-અલગ મોડેલ્સનો ઉપયોગ કરી શકે છે.
માર્કેટ ચેલેન્જ:
જોકે, માર્કેટમાં આ રાહ આસાન નથી. Adobe, Runway અને Pika જેવા દિગ્ગજ ખેલાડીઓ પહેલેથી જ આ મેદાનમાં છે. આ ઉપરાંત કોપીરાઈટ અને ડેટા પ્રાઈવસીના કાયદાઓ પણ એક મોટો પડકાર છે. હવે જોવાનું એ રહેશે કે Eloelo આ ગ્લોબલ દિગ્ગજો સામે પોતાની પ્રોડક્ટને કેવી રીતે અલગ સાબિત કરે છે.