AI-લિંક્ડ શેરોમાં ચાલી રહેલી વૈશ્વિક તેજી હવે રોકાણકારોની ધીરજની કસોટી કરી રહી છે. કંપનીઓના ત્રિમાસિક પરિણામો આવતાની સાથે જ માર્કેટ એ સવાલ કરી રહ્યું છે કે ઇન્ફ્રાસ્ટ્રક્ચર પાછળનો જંગી ખર્ચ શું ખરેખર પ્રોફિટમાં બદલાઈ રહ્યો છે?
વોલ સ્ટ્રીટ પર આર્ટિફિશિયલ ઈન્ટેલિજન્સ (AI) ને લઈને જે આશાવાદ હતો, તેને હવે વાસ્તવિકતાનો સામનો કરવો પડી રહ્યો છે. લાંબા સમયની આંધળી તેજી બાદ, હવે રોકાણકારો માત્ર ભવિષ્યના સપના જોવાની જગ્યાએ કંપનીના હાલના નાણાકીય પરિણામો પર ધ્યાન આપી રહ્યા છે. મુખ્ય ચિંતા એ છે કે 'હાયપરસ્કેલર્સ' દ્વારા ડેટા સેન્ટર્સ અને AI ઇન્ફ્રાસ્ટ્રક્ચર માટે ખર્ચવામાં આવતા $1.2 ટ્રિલિયન જેટલા જંગી નાણાં શું ખરેખર સસ્ટેનેબલ નફો લાવી રહ્યા છે?
સેમિકન્ડક્ટર સેક્ટરમાં પણ સુસ્તી
આ તેજીનું મુખ્ય એન્જિન રહેલું સેમિકન્ડક્ટર માર્કેટ પણ હવે નબળું પડી રહ્યું છે. Philadelphia SE Semiconductor ઇન્ડેક્સ આ મહિને આશરે 12% જેટલો નીચે આવ્યો છે. આ ઘટાડો સૂચવે છે કે AI હાર્ડવેરની જે આક્રમક માંગ હતી તે હવે સ્થિર થઈ રહી છે.
ભારતીય IT સેક્ટર પર શું થશે અસર?
ભારતીય રોકાણકારોએ ખાસ ધ્યાન રાખવું પડશે, કારણ કે TCS, Infosys અને HCLTech જેવી મોટી IT કંપનીઓનો ઘણો બિઝનેસ અમેરિકાની આ ટેક જાયન્ટ્સ પર નિર્ભર છે. જો યુએસ ટેક કંપનીઓ વધતા ખર્ચ કે ઓછા નફાને કારણે તેમના IT ખર્ચમાં કાપ મૂકશે, તો તેની સીધી અસર ભારતીય કંપનીઓના પ્રોજેક્ટ પાઈપલાઈન પર પડી શકે છે.
તદુપરાંત, અમેરિકામાં ફુગાવો અને ફેડરલ રિઝર્વના વ્યાજ દરોની અનિશ્ચિતતા પણ માર્કેટ પર દબાણ બનાવી રહી છે. આવનારા દિવસોમાં કંપનીઓના પરિણામોમાં માત્ર પ્રોફિટ નંબર્સ જ નહીં, પરંતુ મેનેજમેન્ટ દ્વારા ભવિષ્યના ખર્ચ અને AI માંગ વિશેની કોમેન્ટ્રી પર પણ માર્કેટની બાજ નજર રહેશે.