GST Council હવે કેપિટલ ગુડ્સ પર ચૂકવેલા ટેક્સ પર કેશ રિફંડ આપવા અંગે વિચારી રહ્યું છે. અત્યાર સુધી માત્ર ITC (Input Tax Credit) મળતું હતું, પણ આ ફેરફારથી EV અને રિન્યુએબલ એનર્જી જેવા સેક્ટર્સને મોટો ફાયદો થશે.
સિસ્ટમમાં શું બદલાવ આવી શકે?
હાલની સિસ્ટમમાં, જ્યારે કંપનીઓ મોંઘી મશીનરી ખરીદે ત્યારે તેમણે ચૂકવેલો GST 'Input Tax Credit' (ITC) તરીકે ચોપડામાં જમા થાય છે. આ ક્રેડિટનો ઉપયોગ માત્ર ભવિષ્યની ટેક્સ જવાબદારીઓ સામે જ થઈ શકે છે. જે કંપનીઓ મોટા પાયે રોકાણ કરે છે, તેમનું મોટું ભંડોળ આ રીતે વર્ષો સુધી બ્લોક થઈ જાય છે.
કયા સેક્ટર્સને થશે ફાયદો?
સરકારનો આ પ્રસ્તાવ રિન્યુએબલ એનર્જી, ઇલેક્ટ્રિક વ્હીકલ (EV) મેન્યુફેક્ચરિંગ અને ટેક્સટાઇલ જેવા ઉદ્યોગોને ધ્યાનમાં રાખીને છે. આ સેક્ટર્સમાં શરૂઆતમાં મશીનરી પાછળ જંગી ખર્ચ થાય છે. જો સરકાર આ કેશ રિફંડ આપે, તો આ કંપનીઓના હાથમાં રોકડ રકમ આવશે, જેનો ઉપયોગ તેઓ પ્લાન્ટના વિસ્તરણ માટે કરી શકશે અને તેમની લિક્વિડિટીમાં મોટો સુધારો જોવા મળશે.
સરકાર સામે પડકાર શું છે?
આ કોઈ સામાન્ય વહીવટી ફેરફાર નથી. GSTની આવક કેન્દ્ર અને રાજ્ય વચ્ચે વહેંચાય છે, તેથી સીધું કેશ પેમેન્ટ આપવાથી સરકારી તિજોરી પર બોજ પડી શકે છે. આથી, સરકાર કોઈ પણ નિર્ણય લેતા પહેલા તેની આર્થિક અસર (Revenue Impact) તપાસી રહી છે. સંભવ છે કે સરકાર આ રિફંડ માટે 'રિસ્ક-બેઝ્ડ એપ્રોચ' અપનાવે, જેથી રાજ્યના બજેટ પર તાત્કાલિક અસર ન પડે.
ઓટોમેશન અને ટેકનોલોજી પર ભાર
આગામી 7 ઓક્ટોબરની મીટિંગમાં GST કાઉન્સિલ ટેક્સ એડમિનિસ્ટ્રેશનના આધુનિકીકરણ પર પણ ચર્ચા કરશે. સરકારનું લક્ષ્ય છે કે ટેકનોલોજી દ્વારા અંદાજે 90% ITC ક્લેમ્સ ઓટોમેટિકલી મંજૂર થઈ જાય. આનાથી મેન્યુઅલ વેરિફિકેશનની પ્રક્રિયા ઘટશે અને ઈન્ડસ્ટ્રીમાં કામકાજ વધુ ઝડપી બનશે.