તહેવારોની સિઝનમાં મળતા ડિસ્કાઉન્ટ પાછળ ઘણીવાર મોંઘા ભાવ અને છુપા ખર્ચ છુપાયેલા હોય છે. રોકાણ કરતા પહેલા રિયલ એસ્ટેટ પ્રોજેક્ટના RERA એપ્રુવલ, લીગલ ટાઈટલ અને ટોટલ કોસ્ટની ગણતરી કરવી અત્યંત જરૂરી છે.
તહેવારોની સિઝનમાં રિયલ એસ્ટેટ ડેવલપર્સ વેચાણ વધારવા માટે આકર્ષક સ્કીમ્સ અને જાહેરાતોનો મારો ચલાવે છે. ફ્રી ઈન્ટિરિયર પેકેજ કે સ્ટેમ્પ ડ્યુટી માફી જેવી ઓફર્સ તમને લલચાવી શકે છે, પરંતુ તે ઘણીવાર પ્રોપર્ટીની વાસ્તવિક નાણાકીય કિંમતને છુપાવી દે છે.
ડિસ્કાઉન્ટનો છટકો
ઘણીવાર ડેવલપર્સ ડિસ્કાઉન્ટ આપતા પહેલા બેઝ પ્રાઈસ (Base Price) વધારી દે છે, જે માત્ર બચતનો આભાસ કરાવે છે. તમારે ઓફર પર આંધળો વિશ્વાસ કરવાને બદલે, તે વિસ્તારમાં તાજેતરમાં નોંધાયેલા સમાન પ્રોજેક્ટ્સના ભાવ સાથે તેની સરખામણી કરવી જોઈએ. જો ડિસ્કાઉન્ટેડ ભાવ પણ વિસ્તારના સરેરાશ ભાવ કરતા વધારે હોય, તો સાવચેત રહેવું.
કાયદાકીય અને રેગ્યુલેટરી તપાસ
પ્રોજેક્ટનું RERA રજીસ્ટ્રેશન તપાસવું એ સૌથી પહેલું અને મહત્વનું પગલું છે. માત્ર સેલ્સ ટીમની વાતો પર ભરોસો ન રાખો. સરકારી RERA વેબસાઈટ પર પ્રોજેક્ટનો નંબર ચેક કરો. આ ઉપરાંત, જમીનના કાયદાકીય દસ્તાવેજો (Land Title) અને મંજૂર થયેલા પ્લાન તપાસવા ખૂબ જ જરૂરી છે. શક્ય હોય તો, બુકિંગ એગ્રીમેન્ટ કાયદાકીય નિષ્ણાત પાસે વંચાવો જેથી પઝેશન ટાઈમલાઈન કે અન્ય શરતોમાં પાછળથી કોઈ વિવાદ ન થાય.
ખર્ચનું ગણિત
પ્રોપર્ટીની મૂળ કિંમત ઉપરાંત તમારે GST, સ્ટેમ્પ ડ્યુટી, રજીસ્ટ્રેશન ચાર્જીસ અને અન્ય લોકેશન ચાર્જીસ ચૂકવવાના હોય છે, જે કુલ ખર્ચમાં ૧૦% થી ૧૫% નો વધારો કરી શકે છે. તમારી બચતની બધી જ રકમ ડાઉન પેમેન્ટમાં ન વાપરતા, પઝેશન પછીના ઈન્ટિરિયર કામ અને મેન્ટેનન્સ ડિપોઝિટ માટે લિક્વિડિટી રાખવી જરૂરી છે. એક યોગ્ય નાણાકીય પ્લાનિંગ તમને આર્થિક તણાવથી મુક્ત રાખશે.