RBI ના મોટા પગલાં! 1.4 લાખ બેંક કર્મચારીઓને તાલીમ આપવા 'મિશન સક્ષમ' લોન્ચ

'મિશન સક્ષમ' : વ્યાપક તાલીમ પહેલ

'SAKSHAM' નો અર્થ છે 'સક્ષમ બનાવવું'. આ પહેલ શહેરી સહકારી બેંક (UCB) ક્ષેત્ર માટે એક વ્યાપક, રાષ્ટ્રીય તાલીમ કાર્યક્રમ છે. તેમાં રૂબરૂ અને ઓનલાઈન લર્નિંગ વિકલ્પોનો સમાવેશ થાય છે, જેનો ઉદ્દેશ્ય આશરે 1,40,000 કર્મચારીઓ સુધી પહોંચવાનો છે.

કોને તાલીમ મળશે?

આ તાલીમ બોર્ડના સભ્યો, સિનિયર મેનેજરોથી લઈને રિસ્ક, કમ્પ્લાયન્સ અને IT જેવા મુખ્ય કાર્યોના વડાઓ સુધીના તમામ સ્તરોના કર્મચારીઓ માટે છે. RBI શક્ય હોય ત્યાં પ્રાદેશિક ભાષાઓમાં પણ કન્ટેન્ટનો સમાવેશ કરવાની યોજના ધરાવે છે. આ તાલીમ કાર્યક્રમની રૂપરેખા UCBs ના અમ્બ્રેલા ઓર્ગેનાઈઝેશન અને સહકારી ફેડરેશનો સાથેની ચર્ચાઓ બાદ તૈયાર કરવામાં આવી છે.

પહેલના મુખ્ય ઉદ્દેશ્યો

મિશન સક્ષમના મુખ્ય ઉદ્દેશ્યો UCB કર્મચારીઓની મેનેજરિયલ અને ઓપરેશનલ ક્ષમતાઓમાં નોંધપાત્ર સુધારો કરવાનો છે. આ ઉપરાંત, નિયમોના પાલન (Compliance) ની મજબૂત સંસ્કૃતિનું નિર્માણ કરવું અને સંભવિત પડકારોનો સામનો કરવાની ક્ષેત્રની ક્ષમતા વધારવી. આનું અંતિમ લક્ષ્ય સતત શીખવા માટે એક સ્વ-ટકાઉ પ્રણાલી (Self-sustaining system) વિકસાવવાનું છે.

UCBs માટે આ તાલીમ શા માટે મહત્વની છે?

ગવર્નર મલ્હોત્રાએ જણાવ્યું કે UCBs ના વિકાસનો આગામી તબક્કો બહેતર કુશળતા, ટેકનિકલ ક્ષમતાઓ અને મજબૂત ઓપરેશનલ રેઝિલિયન્સ (Operational Resilience) વિકસાવવા પર નિર્ભર રહેશે. તેમણે એ પણ ઉલ્લેખ કર્યો કે આ પહેલની પ્રથમ જાહેરાત 6 ફેબ્રુઆરી, 2026 ના રોજ થયેલી મોનેટરી પોલિસી રિવ્યુ (Monetary Policy Review) દરમિયાન કરવામાં આવી હતી.