RBI ગવર્નર સંજય મલ્હોત્રાએ ખાનગી ક્રિપ્ટોકરન્સી સામે ચેતવણી ઉચ્ચારી છે. તેમણે જણાવ્યું કે ગ્લોબલ લેવલે AI અને સરકારી ખર્ચને કારણે બોન્ડ યીલ્ડ વધી રહ્યા છે, જે ભવિષ્યમાં કંપનીઓ માટે બોરોઈંગ કોસ્ટ (Borrowing Cost) વધારી શકે છે.
ક્રિપ્ટો અંગે RBIનું સ્ટેન્ડ સ્પષ્ટ
કૌટિલ્ય ઇકોનોમિક કોન્ક્લેવમાં RBI ગવર્નર સંજય મલ્હોત્રાએ સ્પષ્ટ કર્યું છે કે બેંક બ્લોકચેન અને ટોકનાઈઝેશન જેવી ટેકનોલોજીને પ્રોત્સાહન આપવા માટે કટિબદ્ધ છે, પરંતુ ખાનગી ક્રિપ્ટોકરન્સી અંગે ગંભીર ચિંતા યથાવત છે. ગવર્નરના મતે, આ ખાનગી ડિજિટલ ટોકન્સ દેશની મની સપ્લાય અને કેપિટલ ફ્લોમાં અવરોધ પેદા કરી શકે છે. તેના બદલે, RBI CBDC (Central Bank Digital Currency) ને સુરક્ષિત વિકલ્પ તરીકે જોઈ રહ્યું છે, ખાસ કરીને ક્રોસ-બોર્ડર પેમેન્ટ્સમાં જ્યાં હાલ વધુ ઘર્ષણ જોવા મળે છે.
બોન્ડ યીલ્ડ અને વધતો જતો આર્થિક બોજ
ગવર્નરે આર્થિક વાતાવરણ પર પ્રકાશ પાડતા જણાવ્યું કે ગ્લોબલ બોન્ડ યીલ્ડમાં સતત વધારો થઈ રહ્યો છે. આ પાછળનું મુખ્ય કારણ આર્ટિફિશિયલ ઇન્ટેલિજન્સ (AI) માટે કરવામાં આવતું તોતિંગ રોકાણ અને વધતો જતો સરકારી ખર્ચ છે. રોકાણકારો માટે આ એક ચેતવણી સમાન છે, કારણ કે ઊંચા બોન્ડ યીલ્ડને લીધે કંપનીઓ માટે લોન લેવી મોંઘી બનશે, જેની સીધી અસર તેમના પ્રોફિટ માર્જિન પર પડી શકે છે.
બેંકિંગ સિસ્ટમની મજબૂતી પર ભાર
દેશની બેંકિંગ સિસ્ટમ હાલમાં મજબૂત સ્થિતિમાં છે, પરંતુ ગવર્નરે કોઈપણ પ્રકારની બેદરકારી ન રાખવાની સલાહ આપી છે. બેન્કિંગ ક્ષેત્રે અગાઉના વર્ષોમાં થયેલા બેડ લોન (Bad Loans) ક્લીનઅપના અનુભવોમાંથી શીખીને, RBI સતત દેખરેખ રાખી રહી છે જેથી સિસ્ટમ આંતરિક અને બાહ્ય આંચકાઓ સામે ટકી શકે.