Indian Railways એ હવે હાઈબ્રિડ એન્યુઈટી અને ડેવલપમેન્ટ પાર્ટનર મોડલ અપનાવવાનું નક્કી કર્યું છે. આ ફેરફાર પાછળનો હેતુ ₹2.62 લાખ કરોડના પ્રોજેક્ટ્સ માટે પ્રાઈવેટ ફંડિંગ આકર્ષવાનો છે, જેથી ઇન્ફ્રાસ્ટ્રક્ચર પ્રોજેક્ટ્સ ઝડપથી પૂરા થઈ શકે.
રેલવેના ફંડિંગમાં મોટો બદલાવ
Indian Railways એ નેશનલ મોનેટાઈઝેશન પાઈપલાઈન 2.0 હેઠળ એક નવો રોડમેપ તૈયાર કર્યો છે. હવે પરંપરાગત EPC કોન્ટ્રાક્ટને બદલે, હાઈબ્રિડ એન્યુઈટી મોડલ (HAM) અને ડેવલપમેન્ટ પાર્ટનર મોડલ પર ધ્યાન કેન્દ્રિત કરવામાં આવશે. આ ફેરફાર એવા પ્રોજેક્ટ્સને પ્રોત્સાહન આપશે જે અત્યાર સુધી ફંડિંગના અભાવે અટવાયેલા હતા.
હાઈબ્રિડ એન્યુઈટી મોડલ (HAM) ની ખાસિયત
નેશનલ હાઈવેમાં સફળ રહેલા આ મોડલમાં ટ્રાફિક અને ટેરિફનું જોખમ સરકાર ઉઠાવશે. પ્રોજેક્ટના બાંધકામ ખર્ચના 40% સરકાર ચૂકવશે, જ્યારે બાકીના 60% ખર્ચ ખાનગી ભાગીદાર કરશે. આનાથી ડેવલપર્સને સુરક્ષા મળશે અને બેન્કિંગ ફાઈનાન્સ મેળવવું સરળ બનશે. હાલમાં જ પબ્લિક પ્રાઈવેટ પાર્ટનરશિપ એપ્રેઝલ કમિટીએ ₹31,814 કરોડના અંદાજિત ખર્ચવાળા 6 રેલ પ્રોજેક્ટ્સને મંજૂરી આપી છે.
કઈ કંપનીઓને મોટો ફાયદો?
આ પોલિસી બાદ લાર્સન એન્ડ ટુબ્રો (L&T), KEC International, Rail Vikas Nigam Limited (RVNL) અને IRCON International જેવી કંપનીઓ માટે નવી તકો ખુલી છે. ખાસ કરીને સ્ટેશન રિડેવલપમેન્ટ અને કાર્ગો ટર્મિનલ બનાવતી કંપનીઓ આ બિડિંગમાં મુખ્ય ભૂમિકા ભજવશે.
રોકાણકારો માટે ચેતવણી
જોકે, રેલવે પ્રોજેક્ટ્સમાં ઓપરેશનલ સેફ્ટી અને નેટવર્ક સિંક્રનાઈઝેશન જેવા પડકારો છે. ઉપરાંત, જમીન સંપાદન અને ક્લિયરન્સમાં થતા વિલંબ પ્રોજેક્ટના ખર્ચમાં વધારો કરી શકે છે. સરકારે 50 વર્ષ સુધીના લાંબા કન્સેશન ટર્મ્સ આપવાની યોજના બનાવી છે, જેથી પ્રોજેક્ટની વાયબિલિટી જળવાઈ રહે. હવે માર્કેટની નજર આગામી ટેન્ડરની તારીખો પર રહેશે.