અમેરિકન માર્કેટ પર આધારિત જાણીતો '4% વિડ્રોઅલ રૂલ' ભારતમાં મોંઘવારી અને વધતા મેડિકલ ખર્ચ સામે નિષ્ફળ સાબિત થઈ શકે છે. રિટાયરમેન્ટના કોર્પસને સુરક્ષિત રાખવા માટે 'બકેટ એપ્રોચ' જેવી ફ્લેક્સિબલ વ્યૂહરચના અપનાવવી અનિવાર્ય છે.
રિટાયરમેન્ટ પ્લાનિંગમાં 4% રૂલ ખૂબ પ્રચલિત છે, જે મુજબ તમે દર વર્ષે તમારા પોર્ટફોલિયોમાંથી 4% રકમ ઉપાડી શકો છો. જોકે, આ નિયમ અમેરિકન માર્કેટને ધ્યાનમાં રાખીને બન્યો છે. ભારતના આર્થિક પરિદ્રશ્યમાં તેને આંધળુકું અનુસરવું જોખમી છે, કારણ કે 25-30 વર્ષ સુધી ચાલી શકે તેવી આ સફરમાં નાણાં ખૂટી જવાનું જોખમ રહેલું છે.
મોંઘવારીનો માર અને મેડિકલ ખર્ચ
ભારતમાં સામાન્ય મોંઘવારી 6% થી 7% ની વચ્ચે રહે છે, પરંતુ મેડિકલ ઇન્ફ્લેશન તો 10% થી 14% સુધી પહોંચી જાય છે. જો તમારો પોર્ટફોલિયો માત્ર 5% થી 6% વળતર આપે, તો મોંઘવારી સામે તમારી ખરીદશક્તિ સતત ઘટતી જશે.
'સિક્વન્સ ઓફ રિટર્ન' નું જોખમ
જો રિટાયરમેન્ટના શરૂઆતના વર્ષોમાં જ માર્કેટમાં મોટો ઘટાડો આવે, તો તમારે નુકસાનમાં શેર વેચવા પડે છે, જેનાથી પોર્ટફોલિયોની રિકવરી ક્ષમતા ઘટી જાય છે. આ માટે શોર્ટ-ટર્મ જરૂરિયાતો અને લોન્ગ-ટર્મ રોકાણ વચ્ચે સ્પષ્ટ અંતર રાખવું જરૂરી છે.
શું છે અસરકારક વિકલ્પ?
૧. બકેટ સ્ટ્રેટેજી (Bucket Strategy): આમાં તમે 2 થી 3 વર્ષનો ખર્ચ લિક્વિડ ફંડ્સ કે બેંક ડિપોઝિટમાં રાખો છો. જ્યારે માર્કેટ તૂટે, ત્યારે આ 'કેશ બકેટ' માંથી પૈસા વાપરો જેથી તમારા ઇક્વિટી રોકાણને રિકવર થવાનો સમય મળે.
૨. ગાર્ડરેલ એપ્રોચ: આમાં બજારની સ્થિતિ મુજબ ખર્ચમાં ફેરફાર કરવામાં આવે છે. માર્કેટ ખરાબ હોય ત્યારે ખર્ચ ઘટાડવો અને સારા વર્ષોમાં તેને વધારવો. રિટાયરમેન્ટને સુરક્ષિત બનાવવા માટે દર વર્ષે ટેક્સ અને મોંઘવારીને ધ્યાનમાં રાખીને પોર્ટફોલિયોનું રિવ્યુ કરવું અત્યંત મહત્વનું છે.