ભારતીય રોકાણકારો જેઓ વિદેશી શેર ધરાવે છે, તેઓ હવે ઘરેલુ ઇક્વિટીની જેમ ₹1.25 લાખની વાર્ષિક LTCG ટેક્સ મુક્તિનો દાવો કરી શકશે નહીં. તમામ લાંબા ગાળાના ગેઈન પર સીધો **12.5%** ટેક્સ લાગશે.
ટેક્સના નવા નિયમોથી કેમ દૂર રહ્યા વિદેશી શેર?
ઘરેલુ શેરબજારમાં રોકાણ કરતા રોકાણકારોને વાર્ષિક ₹1.25 લાખ સુધીના લાંબા ગાળાના કેપિટલ ગેઈન્સ (LTCG) પર ટેક્સમાંથી મુક્તિ મળે છે, પરંતુ વિદેશી શેર આ લાભથી વંચિત છે. આ તફાવતનું મુખ્ય કારણ 'સિક્યોરિટીઝ ટ્રાન્ઝેક્શન ટેક્સ' (STT) છે. ભારતીય એક્સચેન્જ પર લિસ્ટેડ અને STT લાગુ પડતા શેરને જ આ ટેક્સ બેનિફિટ મળે છે, જે વિદેશી શેરોમાં હોતો નથી.
ટેક્સનો બોજ કેટલો?
જો તમે વિદેશી શેરને 24 મહિનાથી વધુ સમય માટે હોલ્ડ કરો છો, તો તેના પર થતા ગેઈન પર તમારે 12.5% ના દરે ટેક્સ ચૂકવવો પડશે. ખાસ વાત એ છે કે, ઘરેલુ પોર્ટફોલિયોની જેમ અહીં કોઈ 'એક્ઝેમ્પશન લિમિટ' નથી. એટલે કે, પહેલા રૂપિયાથી જ ટેક્સની ગણતરી શરૂ થઈ જશે. ઉદાહરણ તરીકે, જો તમે કોઈ ટેક સ્ટોકમાંથી ₹1 લાખનો નફો કરો છો, તો ઘરેલુ શેરમાં તે ટેક્સ-ફ્રી હોઈ શકે, પણ વિદેશી શેરમાં તેના પર પૂરો ટેક્સ લાગશે.
શોર્ટ ટર્મ ગેઈન્સ અને કમ્પ્લાયન્સ
24 મહિના કે તેથી ઓછા સમય માટે રાખવામાં આવેલા શેરમાં થતો નફો તમારી ઇન્કમ ટેક્સ સ્લેબ મુજબ ગણવામાં આવશે, જે ઊંચા ટેક્સ બ્રેકેટમાં આવતા રોકાણકારો માટે મોટો ફટકો છે. આ ઉપરાંત, વિદેશી એસેટ્સ અને ઇન્કમનું રિટર્નમાં 'Schedule FA' હેઠળ ડિસ્ક્લોઝર આપવું ફરજિયાત છે. વિદેશી કરન્સીના ભાવ અને ટ્રેડ કન્ફર્મેશનના ચોક્કસ રેકોર્ડ રાખવા પણ હવે રોકાણકારો માટે અનિવાર્ય બન્યા છે, જેથી ભવિષ્યમાં કોઈપણ નિયમનકારી તપાસથી બચી શકાય.