આ દિવાળી પર કંપની તરફથી મળતા બોનસ કે ગિફ્ટ પર હવે નવા નિયમો લાગુ પડે છે. જો તમે Income-tax Act, 2025 ના નિયમોને નહીં સમજો, તો તમારા ટેક-હોમ પે (Take-home pay) માં મોટો કાપ આવી શકે છે.
દિવાળીનો તહેવાર નજીક છે ત્યારે કર્મચારીઓ માટે ખુશીની સાથે ટેક્સની ગણતરી સમજવી પણ એટલી જ જરૂરી છે. ૧ એપ્રિલ, 2026 થી અમલમાં આવેલા Income-tax Act, 2025 હેઠળ ગિફ્ટ અને બોનસના નિયમો બદલાયા છે, જે તમારી સીધી કમાણી પર અસર કરી શકે છે.
નોન-કેશ ગિફ્ટની લિમિટ
નવા નિયમ મુજબ, જો કંપની તમને ડિજિટલ વાઉચર, ગિફ્ટ કાર્ડ કે કોઈ ભેટ આપે છે, તો તે આખા વર્ષમાં ₹15,000 સુધી જ ટેક્સ-ફ્રી રહેશે. યાદ રાખો, આ મર્યાદા વાર્ષિક ધોરણે છે. જો વર્ષ દરમિયાન મળેલી તમામ નોન-કેશ ગિફ્ટની કુલ વેલ્યુ ₹15,000 ને પાર કરી જાય, તો તે પૂરેપૂરી રકમ પર ટેક્સ લાગશે.
કેશ બોનસ અને TDS
કેશ બોનસને તમારા પગારનો જ ભાગ માનવામાં આવે છે, જે પહેલા રૂપિયાથી જ ટેક્સપાત્ર છે. સેક્શન 392 મુજબ, એમ્પ્લોયર આ બોનસ પર TDS કાપશે. આનો સીધો અર્થ એ છે કે તમારા ખાતામાં આવતા કુલ બોનસમાંથી ટેક્સ કપાઈને જ રકમ આવશે.
Section 87A નો ખતરો
સૌથી મહત્વની વાત એ છે કે, જો બોનસ મળવાથી તમારી કુલ ટેક્સપાત્ર આવક ₹12 લાખ થી વધી જાય, તો તમે Section 87A હેઠળ મળતા ટેક્સ રિબેટનો લાભ ગુમાવી શકો છો. આમ, બોનસ મળવાથી ફાયદો થવાને બદલે ટેક્સનો બોજ વધી શકે છે.
નવી રિપોર્ટિંગ સિસ્ટમ
આ વર્ષે ટેક્સની માહિતી માટે જૂના Form 16 ને બદલે Form 130 દાખલ કરવામાં આવ્યું છે. કંપનીએ વર્ષ દરમિયાન આપેલી તમામ ગિફ્ટની માહિતી આ ફોર્મમાં દર્શાવવી ફરજિયાત છે. જેથી તમારા વાર્ષિક રિટર્નમાં કોઈ મુશ્કેલી ન આવે, તે માટે તમારા પેરોલ ડિપાર્ટમેન્ટ પાસે ગિફ્ટનું સ્ટેટમેન્ટ અગાઉથી જાણી લેવું હિતાવહ છે.