નવી કાર ખરીદતી વખતે મોટાભાગના લોકો સુવિધાના નામે ડીલર પાસેથી જ ઈન્સ્યોરન્સ ખરીદી લે છે, જે મોંઘો સાબિત થઈ શકે છે. Insured Declared Value (IDV) અને જરૂરી એડ-ઓન્સને સરખાવીને તમે ઓનલાઈન સસ્તો અને સારો ઈન્સ્યોરન્સ પોલિસી પ્લાન પસંદ કરી શકો છો.
નવી કાર ખરીદતી વખતે ડીલર ઘણીવાર ગાડી સાથે જ ઈન્સ્યોરન્સનું પેકેજ પધરાવી દે છે. આ પ્રક્રિયા ભલે સરળ લાગે, પણ મોટાભાગે તે ઓપન માર્કેટમાં મળતી પોલિસી કરતા મોંઘી હોય છે. ડીલર પોતે એક કોર્પોરેટ એજન્ટ તરીકે કામ કરતા હોવાથી અહીં પારદર્શિતાનો અભાવ જોવા મળે છે.
શું ડીલરનો ઈન્સ્યોરન્સ ખરેખર શ્રેષ્ઠ છે?
સેલ્સ ટીમ ઘણીવાર એવું કહે છે કે તેમના ઈન્સ્યોરન્સમાં જ 'કેશલેસ' સર્વિસ મળશે, પરંતુ આ વાત સંપૂર્ણ સત્ય નથી. કેશલેસ સુવિધા ઈન્શ્યોરન્સ કંપનીના નેટવર્ક પર આધારિત હોય છે, નહીં કે તમે ક્યાંથી પોલિસી ખરીદી તેના પર. જો કોઈ ઈન્શ્યોરન્સ કંપનીનું સર્વિસ સેન્ટર સાથે ટાઈ-અપ હોય, તો તમે પોલિસી ગમે ત્યાંથી લો, કેશલેસ સુવિધા તો મળશે જ.
IDV સાથે છેડછાડનું જોખમ
ડીલર ઘણીવાર સસ્તો પ્રીમિયમ બતાવીને ગ્રાહકને ફસાવે છે, પરંતુ તેઓ ગાડીની IDV (Insured Declared Value) ઘટાડી દે છે. IDV એટલે તમારી ગાડીની તે કિંમત જે ચોરી કે ટોટલ લોસના કિસ્સામાં કંપની ચૂકવશે. જો IDV ઓછી હશે, તો ક્લેમ વખતે તમને ઘણું મોટું નુકસાન થઈ શકે છે.
એડ-ઓન્સ (Add-ons) કેવી રીતે પસંદ કરવા?
ડીલર્સ અગાઉથી નક્કી કરેલા પેકેજ આપે છે જેમાં ઘણા બિનજરૂરી એડ-ઓન્સ હોય છે. નવી કાર માટે 'Zero Depreciation' પ્લાન જરૂરી છે, પણ 'Return to Invoice' કે 'Engine Protection' જેવા ફીચર્સ તમારી જરૂરિયાત મુજબ પસંદ કરવા જોઈએ.
તમારે શું કરવું જોઈએ?
૧. ડીલર પાસેથી પ્રીમિયમનું આઈટમવાઈઝ ક્વોટેશન માંગો.
૨. તેમાં IDV અને એડ-ઓન્સની યાદી તપાસો.
૩. આ જ વિગતો સાથે ઓનલાઈન ઈન્સ્યોરન્સ પોર્ટલ પર ભાવ સરખાવો.
૪. ઈન્શ્યોરન્સ કંપનીનો 'Claim Settlement Ratio' ચોક્કસ તપાસો.