ઉત્તરાખંડના મહિલા અને બાળ વિકાસ મંત્રી રેખા આર્યએ પોતાના પતિ ગિરધારી લાલ સાહુ સામે ગંભીર ફરિયાદો નોંધાવી છે. મંત્રીએ મારપીટ, છેતરપિંડી અને કાવતરાના આરોપો લગાવતા દેહરાદૂન પોલીસ સ્ટેશનમાં FIR દાખલ કરવામાં આવી છે.
ઉત્તરાખંડના મંત્રી રેખા આર્યએ દેહરાદૂનના કેન્ટોનમેન્ટ પોલીસ સ્ટેશનમાં પોતાના પતિ ગિરધારી લાલ સાહુ વિરુદ્ધ ફરિયાદ નોંધાવી છે. આ FIR માં માત્ર ઘરેલુ હિંસા જ નહીં, પરંતુ ગંભીર પ્રકારના આર્થિક ગુનાઓનો પણ ઉલ્લેખ કરવામાં આવ્યો છે.
કોર્પોરેટ દસ્તાવેજોમાં છેડછાડનો આરોપ
મંત્રીએ ફરિયાદમાં જણાવ્યું છે કે તેમના પતિએ તેમની જાણ બહાર કોર્પોરેટ દસ્તાવેજોમાં તેમની ખોટી સહીઓ કરી છે. આરોપ મુજબ, કંપનીના ડાયરેક્ટર પદેથી મંત્રીને હટાવવા માટે આ દસ્તાવેજોનો ઉપયોગ કરવામાં આવ્યો હતો, જે સંપૂર્ણપણે અનધિકૃત હતો. આ મામલો હવે કોર્પોરેટ ગવર્નન્સ અને દસ્તાવેજોની વિશ્વસનીયતા પર મોટા સવાલો ઉભા કરે છે.
જાનથી મારવાનું કાવતરું
તપાસનો સૌથી સંવેદનશીલ મુદ્દો એક ઓડિયો રેકોર્ડિંગ છે. રેખા આર્યનો દાવો છે કે આ ઓડિયોમાં તેમને જાનથી મારી નાખવાનું કાવતરું રચવામાં આવ્યું હોવાના પુરાવા છે. પોતાની અને પોતાના બાળકોની સુરક્ષાને ધ્યાનમાં રાખીને તેમણે કાયદાકીય મદદ માંગી છે. હાલમાં દેહરાદૂન પોલીસ આ મામલાની તપાસ કરી રહી છે અને તમામ પુરાવાઓની સત્યતા તપાસવામાં આવી રહી છે.