MPSC કૌભાંડની તપાસ માટે કમિટીની રચના: ચેરમેન રજા પર ઉતર્યા, વિદ્યાર્થીઓની માંગણી સ્વીકારાઈ

મહારાષ્ટ્ર સરકારે પરીક્ષામાં કથિત પેપર લીક અને ગેરરીતિઓના મામલે Maharashtra Public Service Commission (MPSC) સામે તપાસનો ગાળિયો કસ્યો છે. આ તપાસ માટે રચાયેલી હાઈ-લેવલ કમિટીમાં નિવૃત્ત જજ દિલીપ ભોસલેની સાથે વરિષ્ઠ IAS અધિકારી તુકારામ મુંઢે, IPS અધિકારી લક્ષ્મી ગૌતમ, નિવૃત્ત જજ પી.ડી. નાઈક અને પૂર્વ IAS અધિકારી ગણેશ પાટીલનો સમાવેશ કરવામાં આવ્યો છે.

શું છે કમિટીનું કામ?

આ કમિટીને 60 દિવસનો સમય આપવામાં આવ્યો છે, જેમાં તે કમિશનના વર્તમાન અને ભૂતકાળના તમામ વહીવટની ઉંડાણપૂર્વક તપાસ કરશે. આ નિર્ણય પુણેમાં વિદ્યાર્થીઓના 10 દિવસથી ચાલી રહેલા આંદોલન બાદ લેવામાં આવ્યો છે.

વિવેક ભીમનવાર રજા પર

તપાસ નિષ્પક્ષ રહે તે માટે MPSC ચેરમેન વિવેક ભીમનવાર તપાસના સમયગાળા દરમિયાન રજા પર ઉતરી ગયા છે. આ બાબતે નાયબ મુખ્યમંત્રી દેવેન્દ્ર ફડણવીસે સ્પષ્ટ કર્યું છે કે જો કોઈ ગેરરીતિ સાબિત થશે, તો ભારતીય બંધારણની કલમ 317 હેઠળ કડક કાર્યવાહી કરવામાં આવશે.