સ્માર્ટફોન બનાવતી દિગ્ગજ કંપની Lava International માંથી મોટા સમાચાર આવી રહ્યા છે. કંપનીના MD સુનીલ રૈના અને CFO રાજેશ સેઠીએ કંપની છોડવાનો નિર્ણય કર્યો છે, જેના કારણે રોકાણકારો અને માર્કેટમાં ચિંતાનું મોજું ફરી વળ્યું છે.
Lava International હાલમાં એક ખૂબ જ મહત્વપૂર્ણ તબક્કામાંથી પસાર થઈ રહી છે. કંપનીના મેનેજિંગ ડિરેક્ટર સુનીલ રૈના, જેઓ ૧૬ વર્ષથી કંપની સાથે જોડાયેલા હતા, તેઓ ડિસેમ્બરના અંત સુધીમાં પદ છોડશે. આ સાથે જ CFO રાજેશ સેઠી પણ પોતાનું નોટિસ પિરિયડ સર્વ કરી રહ્યા છે. આ અગાઉ ચીફ મેન્યુફેક્ચરિંગ ઓફિસર સંજીવ અગ્રવાલ પણ કંપની છોડીને Micron Technology માં જોડાયા હતા, જેથી સિનિયર મેનેજમેન્ટમાં મોટી ખાલીપો સર્જાયો છે.
વ્યૂહાત્મક મુશ્કેલીઓ અને માર્કેટનું દબાણ
નોઈડા સ્થિત આ ઈલેક્ટ્રોનિક્સ મેકર કંપની હાલમાં એન્ટ્રી-લેવલ સ્માર્ટફોન માર્કેટમાં પોતાની પકડ મજબૂત કરવાના પ્રયાસો કરી રહી છે. જ્યારે ચીની કંપનીઓ પ્રીમિયમ સેગમેન્ટ તરફ વળી રહી છે, ત્યારે Lava પાસે પોતાની માર્કેટ શેર વધારવાની સુવર્ણ તક છે, પરંતુ આવા સમયે નેતૃત્વમાં ફેરફાર કંપનીની ઓપરેશનલ સ્થિરતા પર પ્રશ્નાર્થ ચિહ્ન મૂકે છે.
જૂના વિવાદોની ફરી ચર્ચા
કંપનીના કો-ફાઉન્ડર હરિ ઓમ રાયની ૨૦૨૩ માં મની લોન્ડરિંગના કેસમાં Enforcement Directorate દ્વારા ધરપકડ કરવામાં આવી હતી, જેણે અગાઉ કંપનીને ગવર્નન્સના મુદ્દે ચર્ચામાં લાવી હતી. હવે ટોચના સ્થાનો ખાલી થતા, માર્કેટમાં એવી અટકળો ચાલી રહી છે કે શું પ્રમોટર-લેવલ પર ફરીથી કોઈ ફેરફાર જોવા મળશે? જોકે, કંપની તરફથી સક્સેસન પ્લાન અંગે કોઈ સત્તાવાર નિવેદન હજુ સુધી આવ્યું નથી.
આગામી સમયમાં નવી મેનેજમેન્ટ ટીમ કોણ હશે, તેના પર બધાની નજર ટકેલી છે. શું કંપની બહારના નેતૃત્વને લાવશે કે જૂની ટીમમાં ફેરબદલ કરશે, તે જોવું ખૂબ જ રસપ્રદ રહેશે.