કેન્દ્ર સરકારે નવી દિલ્હીમાં આવેલ Indian Air Force (IAF) સ્પોર્ટ્સ કોમ્પ્લેક્સ બંધ કરવાનો આદેશ આપ્યો છે. સરકારની આ કાર્યવાહીને પગલે રાજકીય ગરમાવો આવ્યો છે અને Indian National Congress દ્વારા તેનો સખત વિરોધ કરવામાં આવી રહ્યો છે.
કેન્દ્ર સરકાર દ્વારા નવી દિલ્હીમાં 7, લોક કલ્યાણ માર્ગ પાસે સ્થિત Indian Air Force (IAF) સ્પોર્ટ્સ કોમ્પ્લેક્સની જમીન પાછી મેળવવાની પ્રક્રિયા શરૂ કરવામાં આવી છે. Union Ministry of Housing and Urban Affairs અંતર્ગત આવતા Land and Development Office (L&DO) દ્વારા નોટિસ ફટકાર્યા બાદ 28 ઓક્ટોબર, 2026 થી આ સ્પોર્ટ્સ કોમ્પ્લેક્સને અનિશ્ચિત સમય માટે બંધ કરી દેવામાં આવ્યું છે. આ પગલાને લઈને કોંગ્રેસે સરકાર પર સૈન્ય સંસ્થાઓ પ્રત્યે અનાદરનો આરોપ લગાવ્યો છે.
શું હતી માંગ?
મળતી માહિતી મુજબ, આઉટગોઈંગ એર ચીફ માર્શલ AP Singh એ 26 ઓક્ટોબર, 2026 ના રોજ ડિફેન્સ મિનિસ્ટરને પત્ર લખીને આ સ્પોર્ટ્સ કોમ્પ્લેક્સને યથાવત રાખવા વિનંતી કરી હતી. તેમનું કહેવું હતું કે આ જગ્યા IAF કર્મચારીઓ માટે ઓપરેશનલ અને સામાજિક દૃષ્ટિએ ખૂબ મહત્વની છે. જોકે, આ પ્રયાસો છતાં કોમ્પ્લેક્સ બંધ કરવામાં આવ્યું, જેના કારણે એર ચીફ માર્શલનો વિદાય સમારંભ પણ રદ કરવો પડ્યો હતો.
સરકારની આક્રમક લેન્ડ રિકવરી પોલિસી
આ કોઈ પહેલો કિસ્સો નથી. L&DO દ્વારા દિલ્હીમાં ઘણી પ્રીમિયમ પ્રોપર્ટીઝ પાછી મેળવવાનું અભિયાન ચલાવવામાં આવી રહ્યું છે. અગાઉ, 53 એકર જમીન ધરાવતા Delhi Race Club, Jaipur Polo Ground અને Delhi Gymkhana Club જેવા પ્રતિષ્ઠિત સ્થળોને પણ સમાન પ્રકારની નોટિસ મળી ચૂકી છે.
સરકારનું માનવું છે કે આ પગલાં જાહેર જમીનનો યોગ્ય ઉપયોગ અને ઈન્ફ્રાસ્ટ્રક્ચર ડેવલપમેન્ટ માટે લેવામાં આવી રહ્યા છે. જોકે, રિયલ એસ્ટેટ અને કોર્પોરેટ જગત માટે આ સ્થિતિ અનિશ્ચિતતા પેદા કરનારી છે. જે સંસ્થાઓ સરકારી જમીન પર લાંબા ગાળાના લીઝ પર કામ કરી રહી છે, તેમના માટે હવે જમીનનો વપરાશ અને તેના અધિકારો અંગે જોખમ વધી ગયું છે.