અમદાવાદમાં બોમ્બની ખોટી ધમકીઓ પાછળ પાકિસ્તાન અને બાંગ્લાદેશ સ્થિત સાયબર નેટવર્કનો હાથ હોવાનું તપાસમાં બહાર આવ્યું છે. હેક કરેલા ઈમેલ એકાઉન્ટ દ્વારા નરેન્દ્ર મોદી સ્ટેડિયમ જેવા જાહેર સ્થળોને ટાર્ગેટ કરાયા હતા.
અમદાવાદ સાયબર ક્રાઈમ બ્રાન્ચની તપાસમાં ચોંકાવનારી વિગતો સામે આવી છે. શહેરના મહત્વના સ્થળોને મળેલી બોમ્બની ખોટી ધમકીઓ પાકિસ્તાન અને બાંગ્લાદેશમાં બેઠેલા ઓપરેટર્સ દ્વારા આપવામાં આવી હતી. 7 ઓક્ટોબર અને 27 ઓક્ટોબરના રોજ મળેલી ધમકીઓ માટે ખાસ કરીને હેક કરેલા ઈમેલ એકાઉન્ટ્સનો ઉપયોગ થયો હતો, જેનો હેતુ માત્ર લોકોમાં ગભરાટ ફેલાવવાનો હતો.
કોણ હતું નિશાના પર?
આ ધમકીઓમાં નરેન્દ્ર મોદી સ્ટેડિયમ અને ગુજરાત હાઈકોર્ટ જેવા હાઈ-પ્રોફાઈલ સ્થળોને ટાર્ગેટ કરવામાં આવ્યા હતા. એટલું જ નહીં, ગાયક દિલજીત દોસાંજના કોન્સર્ટ જેવા કાર્યક્રમોને પણ નિશાન બનાવી અલગતાવાદી નિવેદનો આપ્યા હતા. ગૂગલ પાસેથી મળેલી માહિતી અને ડિજિટલ ફોરેન્સિક તપાસમાં આ ધમકીઓ બાંગ્લાદેશના રંગપુર અને પાકિસ્તાનના રાવલપિંડી અને લાહોરથી આવી હોવાનું સ્પષ્ટ થયું છે.
કેવી રીતે કામ કરે છે આ નેટવર્ક?
તપાસમાં એક અંડરગ્રાઉન્ડ માર્કેટનો પર્દાફાશ થયો છે, જ્યાં જૂના અને નબળા ઈમેલ એકાઉન્ટ્સના ક્રેડિશિયલ્સનું વેચાણ થાય છે. આ હેક કરેલા એકાઉન્ટ્સ ખરીદવા માટે ક્રિપ્ટોકરન્સીનો ઉપયોગ થાય છે, જેથી પોતાની ઓળખ છુપાવી શકાય. સાયબર ગુનેગારો એકથી વધુ ઈન્ટરમીડિયરીનો ઉપયોગ કરી પોલીસને ગેરમાર્ગે દોરવાનો પ્રયાસ કરે છે.
દેશની સુરક્ષા એજન્સીઓ અત્યારે ડેટા ટ્રેકિંગ અને આવા ગેરકાયદેસર નેટવર્કને તોડવા માટે મિશન મોડમાં કામ કરી રહી છે. જાહેર સ્થળોની સુરક્ષા માટે હવે વધુ સજ્જ અને અદ્યતન ડિજિટલ ઈન્ટેલિજન્સ સિસ્ટમની જરૂરિયાત ઊભી થઈ છે.