ઘણીવાર મ્યુચ્યુઅલ ફંડના ફેક્ટશીટમાં તમે જોયું હશે કે ફંડ પાસે રોકડ રકમ (Cash) પડી હોય છે. શું આ રોકાણકારો માટે સારું છે કે પછી તમારા રિટર્ન પર અસર કરી રહ્યું છે? જાણો, ફંડ મેનેજર કેમ કેશ રાખે છે અને ક્યારે તમારે સાવધાન રહેવું જોઈએ.
ઇક્વિટી મ્યુચ્યુઅલ ફંડનું મુખ્ય કામ સ્ટોક માર્કેટમાં રોકાણ કરવાનું છે, પરંતુ જો તમે તેની મંથલી ફેક્ટશીટ જોશો, તો તમને હંમેશા જોવા મળશે કે ફંડ 100% ઇન્વેસ્ટેડ નથી હોતું. આ જોઈને રોકાણકારોને પ્રશ્ન થાય કે ફંડ મેનેજર પૈસાને કામે કેમ નથી લગાડતા?
લિક્વિડિટી મેનેજમેન્ટ કેમ જરૂરી છે?
ફંડ એક બિઝનેસની જેમ કામ કરે છે. જ્યારે કોઈ રોકાણકાર પોતાના યુનિટ વેચીને બહાર નીકળે, ત્યારે ફંડ મેનેજરે તેમને તાત્કાલિક પેમેન્ટ કરવાનું હોય છે. જો બધું જ રોકાણ શેરમાં હોય, તો મેનેજરે ગભરાટમાં શેર વેચવા પડે જે નુકસાનકારક હોઈ શકે છે. તેથી, આ કેશ રિઝર્વ 'બફર' તરીકે કામ કરે છે.
SEBI ના નિયમો અને કેશ ડ્રેગ (Cash Drag)
SEBI ના નિયમો મુજબ, ફંડ આ પૈસાને ટ્રેઝરી બિલ્સ કે સરકારી સિક્યોરિટીઝ જેવા સુરક્ષિત સાધનોમાં પાર્ક કરી શકે છે. પરંતુ સમસ્યા ત્યારે સર્જાય છે જ્યારે આ કેશ લેવલ 10% થી 15% જેટલું વધી જાય. આને ફાઇનાન્સની ભાષામાં 'કેશ ડ્રેગ' કહેવાય છે. જો માર્કેટમાં તેજી હોય અને ફંડ પાસે રોકડ વધારે પડી હોય, તો રોકાણકારોને માર્કેટ રેલીનો પૂરો લાભ મળતો નથી, જેનાથી લાંબે ગાળે રિટર્ન ઘટી શકે છે.
ઈન્ડેક્સ ફંડ અને એક્ટિવ ફંડ વચ્ચેનો તફાવત
- ઇન્ડેક્સ ફંડ / ETF: આ ફંડનો ઉદ્દેશ્ય બેન્ચમાર્કને કોપી કરવાનો છે, તેથી તેમાં કેશ લગભગ શૂન્ય હોવી જોઈએ. જો અહીં કેશ વધારે હોય તો તે ચિંતાનો વિષય છે.
- એક્ટિવ ફંડ: મેનેજર માર્કેટ મોંઘું લાગતું હોય તો સાવચેતીના ભાગરૂપે થોડી કેશ રાખી શકે છે.
તમે કેવી રીતે ચેક કરશો?
કોઈ એક મહિનાની ફેક્ટશીટ જોઈને નિર્ણય ન લેવો. જો સતત 3 થી 6 મહિના સુધી કેશ લેવલ ઉંચુ જણાતું હોય, તો તે ફંડના હેતુ અને તેના રિટર્ન પર ફરી વિચાર કરવાનો સમય છે.