સુપ્રીમ કોર્ટે મેડિકલ સ્ટાફ પર હુમલો કરનારા રાજકારણીઓ સામે લાલ આંખ કરી છે. કોર્ટે સ્પષ્ટ કહ્યું છે કે આવા આરોપીઓને જામીન આપવાને બદલે જેલમાં મોકલવા જોઈએ.
સુપ્રીમ કોર્ટે મેડિકલ પ્રોફેશનલ્સની સુરક્ષાને લઈને અત્યંત કડક વલણ અપનાવ્યું છે. જસ્ટિસ વિક્રમ નાથ અને જસ્ટિસ સંદીપ મહેતાની બેન્ચે સ્પષ્ટ કર્યું છે કે હોસ્પિટલના સ્ટાફ પર હુમલો કરનારા વ્યક્તિઓ જામીન મેળવવાને પાત્ર નથી. કોર્ટે નોંધ્યું હતું કે આરોગ્ય સેવાઓ આપનારા લોકો પર વારંવાર થતા હુમલા કાયદાનું ઉલ્લંઘન છે અને તેને સહન કરી શકાય નહીં.
શું છે સમગ્ર મામલો?
આ સુનાવણી શિવસેનાના કોર્પોરેટર રમેશ મ્હાત્રેની અરજી પર થઈ રહી હતી. તેમના પર જુલાઈ ૨૦૨૬ માં થાણેની શાસ્ત્રી નગર હોસ્પિટલમાં ડૉક્ટરો પર હુમલો કરવાનો આરોપ છે. આ ઘટના હોસ્પિટલના નિયોનેટલ યુનિટમાં બેડની ઉપલબ્ધતા અંગેના વિવાદ બાદ બની હતી. અગાઉ બોમ્બે હાઈકોર્ટે પણ આ ઘટના પર ગંભીર ચિંતા વ્યક્ત કરી હતી.
કોર્ટનું કડક વલણ
સુપ્રીમ કોર્ટના કડક વલણને જોતા, અરજદારના વકીલ મુકુલ રોહતગીએ પોતાની અરજી પાછી ખેંચી લીધી છે. આ નિર્ણય બાદ હવે મહારાષ્ટ્ર સરકારની તે અપીલ પર આગળની કાર્યવાહી થશે, જેમાં આરોપીઓના જામીન રદ કરવાની માંગ કરવામાં આવી છે. કોર્ટે આ કેસની આગામી સુનાવણી ૨૮ સપ્ટેમ્બર, ૨૦૨૬ ના રોજ નક્કી કરી છે.