Rahul Gandhi ના ૨૦૧૮ ના વિવાદાસ્પદ નિવેદન મામલે સુપ્રીમ કોર્ટે મોટી રાહત આપી છે. સુપ્રીમ કોર્ટે નીચલી અદાલતમાં ચાલી રહેલી ક્રિમિનલ માનહાનિની ટ્રાયલ પર સ્ટે લગાવી દીધો છે.
ભારતીય રાજનીતિમાં મોટા ગણાતા આ કેસમાં સુપ્રીમ કોર્ટે રાહુલ ગાંધીને વચગાળાની રાહત આપી છે. જસ્ટિસ વિક્રમ નાથ અને જસ્ટિસ અપરેશ કુમાર સિંહની બેન્ચે આ આદેશ આપ્યો છે, જેના કારણે હવે નીચલી કોર્ટમાં કેસની આગળની કાર્યવાહી સ્થગિત રહેશે.
શું છે સમગ્ર મામલો?
આ વિવાદ વર્ષ ૨૦૧૮ નો છે, જ્યારે ભાજપના કાર્યકર મહેશ એચ. શ્રીશ્રીમાલે રાહુલ ગાંધી વિરુદ્ધ ખાનગી ફરિયાદ નોંધાવી હતી. આ ફરિયાદમાં રાફેલ ફાઈટર જેટ સોદા અંગે કરવામાં આવેલી ટિપ્પણીઓને ટાંકીને તેને બદનક્ષીકારક ગણાવવામાં આવી હતી. ખાસ કરીને "ચોરો કે સરદાર" અને "કમાન્ડર-ઈન-ચીફ" જેવા શબ્દોનો ઉપયોગ પીએમ નરેન્દ્ર મોદી અને ભાજપની છબી ખરડવા માટે કરવામાં આવ્યો હોવાનો આરોપ હતો.
બોમ્બે હાઈકોર્ટ પછી સુપ્રીમમાં રાહત
આ પહેલા ૮ સપ્ટેમ્બર ૨૦૨૬ ના રોજ બોમ્બે હાઈકોર્ટે રાહુલ ગાંધીની અરજી ફગાવી દીધી હતી અને કેસ રદ કરવાનો ઇનકાર કર્યો હતો. આ આદેશ બાદ રાહુલ ગાંધીની ટીમે સુપ્રીમ કોર્ટના દ્વાર ખખડાવ્યા હતા.
હવે સુપ્રીમ કોર્ટે મહારાષ્ટ્ર સરકાર અને ફરિયાદીને નોટિસ પાઠવી ૪ અઠવાડિયાનો સમય આપ્યો છે. આ સમયગાળામાં તેમણે પોતાનો જવાબ રજૂ કરવાનો રહેશે. આગામી સુનાવણીમાં જ સ્પષ્ટ થશે કે આ ટ્રાયલ ચાલુ રહેશે કે સુપ્રીમ કોર્ટ તેને સંપૂર્ણપણે રદ કરશે.