Gujarat High Court એ સ્પષ્ટ કર્યું છે કે સરકારી કર્મચારી પોતાની ઈચ્છા મુજબ નોમિનેશન બદલીને પત્નીના પેન્શનના અધિકારને છીનવી શકતા નથી. કોર્ટના મતે ફેમિલી પેન્શન એ સામાજિક કલ્યાણનો લાભ છે, કોઈ અંગત સંપત્તિ નથી.
Gujarat High Court એ એક મહત્વપૂર્ણ ચુકાદો આપતા સ્પષ્ટ કર્યું છે કે સરકારી કર્મચારીઓ કાયદાકીય રીતે પરણેલી પત્નીને બાજુ પર રાખીને પરિવારના અન્ય સભ્યોને પેન્શનનો લાભ આપી શકતા નથી. કોર્ટે જણાવ્યું હતું કે ફેમિલી પેન્શન એ સામાજિક સુરક્ષાનું માધ્યમ છે, જે કોઈ કર્મચારીની અંગત મિલકત નથી કે જેને તે પોતાની મરજી મુજબ વહેંચી શકે.
શું હતો મામલો?
આ કેસમાં એક સરકારી કર્મચારીએ એફિડેવિટ અને નોમિનેશન ફોર્મ દ્વારા પોતાની પત્નીને પેન્શનના લાભમાંથી બાકાત રાખીને બાળકોને એકમાત્ર લાભાર્થી બનાવવાનો પ્રયાસ કર્યો હતો. જોકે, કોર્ટે આ દલીલ ફગાવી દીધી હતી અને જણાવ્યું હતું કે પેન્શનના નિયમો એક કડક વૈધાનિક માળખું ધરાવે છે, જે કર્મચારીની વ્યક્તિગત કાર્યવાહી કે દસ્તાવેજોથી બદલાઈ શકતું નથી.
કાયદાકીય સ્થિતિ શું છે?
સેવા નિયમો મુજબ, ફેમિલી પેન્શન મેળવવા માટે કાયદેસરની પત્ની પ્રથમ હકદાર છે. જ્યાં સુધી છૂટાછેડાનો કોઈ સત્તાવાર હુકમ ન હોય, ત્યાં સુધી પત્નીનો દરજ્જો અકબંધ રહે છે. ભલે પારિવારિક વિખવાદ હોય, પણ પત્નીના પેન્શન મેળવવાના અધિકારને એકતરફી નોમિનેશન બદલીને છીનવી શકાતો નથી.
કોર્ટે સ્પષ્ટ કર્યું છે કે ટર્મિનલ બેનિફિટ્સ અને ફેમિલી પેન્શન વચ્ચે મોટો તફાવત છે. નોમિનેશન એ માત્ર એક પ્રક્રિયાગત માર્ગદર્શિકા છે, પરંતુ તે સરકારી નિયમો દ્વારા નક્કી કરાયેલી પ્રાથમિકતાને ઓવરરાઈડ કરી શકતી નથી.