દિલ્હી હાઈકોર્ટે પૂર્વ જજ યશવંત વર્મા સાથે જોડાયેલા કેશ કાંડની તપાસ CBI પાસે કરાવવાની માંગ કરતી અરજી ફગાવી દીધી છે. કોર્ટે જણાવ્યું હતું કે અરજદારે યોગ્ય કાયદાકીય પ્રક્રિયાનું પાલન કર્યું નથી.
દિલ્હી હાઈકોર્ટે પૂર્વ જજ યશવંત વર્માના આર્થિક વ્યવહારોની તપાસ CBI પાસે કરાવવા માટેની અરજીને ફગાવી દીધી છે. જસ્ટિસ અમિત બંસલે આ મામલાની સુનાવણી કરતા જણાવ્યું હતું કે, અરજદારે આ પ્રકારની ફરિયાદ માટે જે કાયદાકીય માર્ગ અપનાવવો જોઈએ, તેને બાયપાસ કર્યો છે.
કોર્ટે આ અરજીને "વાઈલ્ડ વિચ હન્ટ" (wild witch hunt) ગણાવીને ટકોર કરી હતી કે નાગરિકોએ કોઈપણ તપાસની માંગ કરતા પહેલા સ્થાનિક પોલીસ કે મેજિસ્ટ્રેટ પાસે જઈને કાયદાકીય પ્રક્રિયા પૂર્ણ કરવી જોઈએ. અગાઉ ઓગસ્ટમાં પણ સુપ્રીમ કોર્ટે આ પ્રકારની એક અરજી ફગાવી દીધી હતી.
વિવાદની શરૂઆત કેવી રીતે થઈ?
આ સમગ્ર મામલો માર્ચ ૨૦૨૫ માં પ્રકાશમાં આવ્યો હતો, જ્યારે દિલ્હીના લ્યુટિયન્સ વિસ્તારમાં સ્થિત યશવંત વર્માના નિવાસસ્થાને આગ લાગી હતી. આ દરમિયાન ફાયર વિભાગના અધિકારીઓને ત્યાંથી મોટી માત્રામાં બિનહિસાબી રોકડ મળી આવી હતી. આ ઘટના બાદ વર્માની બદલી અલાહાબાદ હાઈકોર્ટમાં કરવામાં આવી હતી અને તેમણે ૯ એપ્રિલ ૨૦૨૫ ના રોજ પોતાના પદ પરથી રાજીનામું આપ્યું હતું.
તેમના રાજીનામા પહેલા સંસદમાં તેમના વિરુદ્ધ મહાભિયોગની કાર્યવાહી શરૂ કરવામાં આવી હતી. આ તપાસમાં આરોપો સાબિત થયા હતા અને રિપોર્ટમાં રોકડની હાજરી તથા પુરાવાઓ સાથે ચેડાં થયા હોવાની ગંભીર બાબતો સામે આવી હતી. જોકે, તેમના રાજીનામા બાદ લોકસભામાં આ કાર્યવાહી બંધ કરવામાં આવી હતી.